Heilunarmiðill dæmdur fyrir að strjúka kynfæri pilts

Heilunarmiðill á sjötugsaldri var í Héraðsdómi Norðurlands á dögunum dæmdur í sex mánaða fangelsi fyrir kynferðislega áreitni og blygðunarsemisbrot. Refsingin fellur niður að tveimur árum liðnum haldi maðurinn skilorð. Dómurinn var fjölskipaður.

Brot mannsins átti sér stað á Fosshóteli á Norðurlandi í júní 2014. Brotaþoli málsins, sem var á þeim tíma átján ára, hafði lengi glímt við andlega vanheilsu. Afi hans ráðlagði honum að leita meðferðar hjá heilunarmiðlinum til að ráða bót á þeim vandamálum.

Í málinu lá fyrir hljóðupptaka af fundi mannanna. Brotaþoli hafði komið fyrir upptökutæki án vitundar heilunarmiðlarans. Hinn ákærði mótmælti því að byggt yrði á upptökunni í málinu þar sem hún hefði verið án hans vitundar og leyfis. Á upptökunni heyrist hinn sakfelldi meðal annars segja „Er svolítið síðan þú losaðir úr honum?“

Heilarinn aðeins „millistykki“

Stuttu síðar sagði hann „[þ]ú mátt alveg taka hann sjálfur og strjúka hann ef að þú vilt, þó að ég sé hér.“ Í atvikalýsingu segir að brotaþoli hafi neitað því. Þar segir enn fremur „Ákærði hummar þá og brotaþoli segir: „Mér finnst þetta fínt bara svona, liggja svona eins og ég er.“ Ákærði segir þá: „Jæja elskan. Þó að ég komi svona við þig?“ „Já“ svarar brotaþoli. „Er þetta vont eða gott?“ spyr ákærði. „Bara þægilegt“ svarar brotaþoli. „Já. Ég er nú að setja orku allsstaðar.“ segir ákærði þá.“

Fyrir dómi lýsti heilunarmiðlarinn starfi sínu á þann veg að hann sjálfur væri aðeins „millistykki“. Til hans kæmi orka sem færi svo inn í sjúklinginn. Í dómnum segir orðrétt, „[s]jálfur hefði ákærði augun lokuð á meðan en opnaði í þeirra stað „þriðja augað“ og sæi þá „áruna“. Oftast væri ekki mikið um snertingar en því stýrðu þeir sem ynnu með honum, læknar að handan.“ Bar hann því við að hann hefði þurft að ýta á mjaðmabein brotaþola þar sem það hafi verið vesen milli mjaðmabeins og lærleggs.

Brotaþoli hafði á þessum tíma verið í heimsókn hjá ömmu sinni og eiginmanni hennar. Þau hefðu sagt honum að á hótelinu í bænum væri staddur heilari sem gæti hjálpað honum með kvíða, einelti og vinaleysi. Brotaþoli lýsti því hvernig ákærði hefði í heiluninni snert lim hans utan klæða og fært hann til. „Ég fraus,“ sagði hann fyrir dómi. Ákærði hefði haldið áfram því hann var að „kanna orku“ brotaþola.

Upptakan renndi stoðum undir framburð brotaþola

Að mati dómsins hafði ekkert komið fram sem gerði það að verkum að það bryti gegn réttlátri málsmeðferð ákærða þó litið yrði til upptökunnar við úrlausn málsins.

Framburður aðila fyrir dómi þótti ólíkur en upptakan þótti renna stoðum undir framburð brotaþola. Af henni mátti greina að brotaþoli reyndi ekki að stöðva ákærða. Hins vegar leit fjölskipaður dómurinn til þess að heilunarmiðillinn hafði ekki fengið samþykki til athafna sinna. Hann hefði snert brotaþola og viðhaft við hann kynferðislegt tal. Var hann því sakfelldur.

Að auki var hinum sakfellda heilunarmiðlara gert að greiða brotaþola 400.000 krónur í miskabætur auk alls málskostnaðar. Dóm Héraðsdóms Norðurlands eystra má lesa hér.