Hundar réðust á lömb í Fljótshlíð

Tveir hundar réðust á tvö lömb í Fljótshlíð í gær. Særðust lömbin illa og hafa kennsl verið borin á hundana sem voru þó enn ófundnir í gær.

Þetta kemur fram í tilkynningu frá lögreglunni á Suðurlandi en stutt er síðan fimm hundar drápu þrettán lömb á tveimur fjárbændum á Eyrarbakka. Tveir hundar voru aflífaðir en lögreglan leitar þriggja hunda sem taldir eru hafa þátt í drápinu.

Þá kemur einnig fram að mikil umferð hafi verið í umdæmi lögreglunnar á Suðurlandi nú um helgina. Gekk hún slysalaust fyrir sig þótt orðið hafi nokkrir minniháttar árekstrar.

Einnig var brotist var inn í bifreið á bílastæði við Seljavallalaug í Rangárþingi um miðnætti á fimmtudag. Rúða var brotin til að komast inn í bifreiðinni og bakpoka með fatnaði stolið.

Alls voru 67 ökumenn kærðir fyrir hraðakstur á Suðurlandi í síðustu viku, þrír fyrir að aka undir áhrifum ávana- og fíkniefna og tveir fyrir ölvunarakstur.