Fékk nagla í höndina í beinni útsendingu þegar töfrabragð klikkaði

Það er ekki alltaf tekið út með sældinni að stjórna morgunþætti í sjónvarpi. Þessu komst pólska sjónvarpskonan Marzena Rogalska að á dögunum þegar galdramaður mætti í settið til þess að sýna listir sínar.

Galdramaðurinn skipaði henni að slá ofan á poka sem hún hafði séð hann setja nagla ofan í svo að oddurinn stóð upp. Skiljanlega var hún örlítið smeyk við þetta en hlýddi að lokum. Það fór ekki betur en svo að naglinn stakkst í hönd hennar með þeim afleiðingum að hún þurfti að leita sér læknisaðstoðar. Allt í beinni útsendingu auðvitað.

Myndband af atvikinu má sjá hér að ofan.

Galdramaðurinn, sem var í úrslitum í keppninni Poland got Talent, var víst ekki alveg vaknaður og hafði ruglast eitthvað við undirbúning atriðisins með þessum hörmulegu afleiðingum.

Seinna þennan sama dag deildi sjónvarpskonan á Facebook síðu sinni að hún væri í lagi.