Gæða sér á kökum að loknum ramadan

Eftir fjögurra daga föstu hafa múslimar unnið sér það inn að gera svolítið vel við sig. Nú er Eid al-fitr hátíðin hafin og múslimar á Íslandi slá upp veislu

Tæplega 500 manns eru í Félagi múslíma á Íslandi og í mosku þeirra í dag kom saman fólk á öllum aldri til að þakka gjafir guðs og fagna lokum Ramadan, enda getur tekið á að fasta í 18 tíma í dag í fjórar vikur.

Fjölskyldur og vinir hittast og gefa gjafir

Stöð2 tók nokkra úr söfnuðinum tali að lokinni bænastund í dag, þar á meðal Einar Jónsson sem sagðist alltaf passa upp á að fá frí í vinnunni yfir eid al-fitr hátíðina, enda væri hún eiginlega eins og jólin þar sem fjölskyldan og vinir njóti þess að vera saman. það alltaf gleðilegt að fagna lokum ramadan með eid al-fitr.

„Þessi ramadan var svolítið erfiður líka núna, þannig að það er smá léttir eftir þetta. Í gær kom ég heim og hugsaði með mér: „Fjúff, hann er búinn. Ég má borða núna!“"

Ismail Kolbeinn Jónsson tekur í sama streng og segir að stundum sé svolítið erfitt að fasta á ramadan, en stundum sé það ekkert mál.

Láta hryðjuverk íslamska ríkisins ekki buga sig

Hryðjuverkin í Írak á sunnudag varpa skugga á Eid hátíðina um allan heim, en þar létu minnst 250 múslímar lífið í árás samtakanna sem kenna sig við íslamskt ríki. Imam íslenska söfnuðarins, Ismaeel Malik sem er í heimsókn hér frá Bandaríkjunum, kýs sjálfur að kalla hryðjuverkamennina Satanska ríkið.

„Staðreyndin er sú að þessir menn sem standa að baki þessu, hið satanska ríki Íraks og Sýrland, þeir vilja að við séum sorgmædd, þeir vilja rífa okkur niður, svo það sem við þurfum að gera er að bregðast við með jákvæðni. Við þurfum að leggja hart að okkur við að mennta almenning um hið sanna eðli íslams og til þess að gera það verðum við að halda gleði okkar yfir eid-hátíðina," segir Ismaeel.

Mikill fjölskyldubragur á íslensku hátíðahöldunum

Aðspurður segir hann misjafnt eftir löndum og söfnuðum hvernig eid er fagnað. Hjá söfnuðunum sem hann vinnur mest með, í New York borg, eru hátíðahöldin jafnan bæði lokaðari og lágstemmdari, en á Íslandi sé mikill fjölskyldubragur á eid al-fitr.

„Samfélag múslíma hér á Íslandi er mjög opið svo hér koma bræður okkar og systur saman. Bænastundin er vissulega aðskilin eftir kynjum, en þegar við erum búin að biðja sameinumst við, hlæjum og skemmtum okkur."

Eid miklu skemmtilegri á Íslandi en í Bretlandi

Undir þetta tekur Naima Aden sem flutti til Íslands fyrir 11 mánuðum frá Bretlandi. Hún segir gaman að gera samanburð við moskuna sína heima.

„Ef ég á að vera alveg hreinskilin þá er eid á Íslandi miklu skemmtilegra en eid heima í Bretland. Hérna fær maður köku og svoleiðis! Ég held það sé vegna þess að hér er samfélagið svo smátt að fólk kann betur að meta hvert annað, og allir eru mjög glaðir að hitta aðra múslíma," segir Naima og hlær dátt.

„Fólk vill eignast vini og það borðar saman og bakar kökur. Í Bretlandi eru svo margir múslimar að fólk leggur ekki eins mikið upp úr því lengur. Það er ekkert sérstakt við það að vera múslími í Bretlandi, en hér er það sérstakt og það flæðir allt í mat og kökum og sætindum. Eid er margfalt betra hérna!"