Stuðningurinn við Íraksstríðið var vegna undirgefni og hlýðni

Ísland var eitt þeirra þrjátíu ríkja sem lýstu yfir stuðningi innrás bandaríska og breska hersins í Írak árið 2003. Sú ákvörðun var tekin af þáverandi forsætis- og utanríksiráðherrum, Davið Oddssyni og Halldóri Ásgrímssyni án samráðs við utanríkismálanefnd Alþingis. Ákvörðunin var frá fyrstu stundu gagnrýnd harðlega af formönnum þáverandi stjórnarandstöðuflokka, sem litu á innrásina sem ólögmætt árásarstríð.

Steingrímur J. Sigfússon þáverandi formaður Vinstri grænna segir Íraksstríðið hafa verið dýrkeypt og hörmuleg afglöp í heimsmálunum og breska rannsóknarskýrslan sem kynnt var í gær sýni fram á það.

„Hún náttúrulega er enn ein sönnun þess hversu illa þessi ákvörðun var undirbyggð og illa að henni staðið. Byggði á fölsum og upplognum forsendum og á svig við alþjóðalög.“

Illa ígrunduð og ábyrgðarlaus innrás

Niðurstaða Johns Chilcot formanns nefndarinnar er meðal annars sú að að forsætisráðherra Bretlands hafi tekið þátt í innrás Bandaríkjamanna án þess að hafa hlustað á varnaðarorð eða gert sér grein fyrir afleiðingunum.

„Það voru fyrst og fremst Bandaríkin sem hnýttu Breta aftan í sig, hinn vígreifa Tony Blair sem þá var, og síðan voru þrædd upp lönd til að láta þetta líta út fyrir að vera einhverja fjölþjóðlega aðgerð," segir Steingrímur. „Ísland lendir á þessum lista sem er náttúrulega hneysa að við vopnlaus og herlaus og friðlsöm þjóð skyldum blanda okkur í þetta, sem er yfirgengilegt og smánarblettur á þeim sem á því bera ábyrgð.“

Herinn fór samt

Steingrímur sagði sjálfur árið 2003 að ákvörðun Davíðs og Halldórs bæri vott um skilyrðislausa hlýðni þeirra og undirgefni gagnvart Bandaríkjunum vegna ótta við að bandaríski herinn færi frá Keflavík.

„Ég stend enn við það að að einhverju leyti var þessi taumlausa hlýðni við Bandaríkin vegna þess að ráðamenn flestir á þeim tíma voru á hnjánum af ótta við að herinn færi. En hann fór nú samt, sem betur fer og lítið hafðist upp úr krafsinu að því leytinu til.“

Leiðari Morgunblaðsins fjallar um málið

Davíð Oddsson baðst undan ósk fréttastofu um viðtal í dag vegna málsins og sagðist engu hafa að bæta við leiðara Morgunblaðsins, þar sem hann er nú snúinn aftur til starfa.

Í leiðaranum segir meðal annars að fyrir löngu hafi orðið ljóst að helsta efnisforsenda árásarinnar, fullyrðingar um efnavopnabúr Saddams Husseins, hafi ekki verið fyrir hendi. Þá er í leiðaranum hnykkt út með þeirri niðurstöðu rannsóknarnefndarinnar að innrásin í Írak hafi þrátt fyrir allt ekki verið ólögmæt.