Tæplega fjögurþúsund skora á Strætó að leyfa gæludýr

Tæplega fjögurþúsund manns hafa skrifað undir undirskriftalista þar sem Strætó er hvatt til þess að leyfa gæludýr í strætisvögnum félagsins.

Í fréttum Stöðvar 2 í gær var rætt við varaformann Astma- og ofnæmisfélags Íslands sem sagði að yrðu gæludýr leyfð í strætó myndi strætóferðin breytast í „svolitla rússneska rúllettu“.

Í kvöld var hins vegar rætt við formann Hundaræktarfélagsins sem vildi meina að þeir aðilar sem byggju við þessa „fötlun“ hefðu ekki fært fram rök sem sýndu fram á að gæludýr ættu að vera bönnuð í strætó.

Í texta sem fylgir undirskriftasöfnuninni segir að fjölmargir kjósi að lifa bíllausum lífstíl. Fjölmargir til viðbótar hefðu áhuga á því en gætu það ekki þar sem gæludýr eru bönnuð í strætó.

„Að hafa þann möguleika að geta ferðast með gæludýrið í strætó myndi auðvelda mörgum sem glíma við kvíðaraskanir eða aðrar hömlur sem binda fólk við gæludýrin sín,“ segir á síðunni.

Sem stendur hafa 3.888 skrifað undir.