Fjarlægði tönn sonarins með aðstoð þyrlu

Laus tönn, pabbi með 13 ára flugreynslu og þyrla.

Rick Rahim frá Virginíu í Bandaríkjunum fór heldur óhefðhundna leið til að fjarlægja lausa tönn úr sjö ára gömlum syni sínum á dögunum. Eins og sjá má í meðfylgjandi myndbandi gerði hann sér lítið fyrir og strengdi band milli tannarinnar og þyrlu sem hann hefur til umráða.

Myndbandið birti hinn fjögurra barna faðir á Facebook-síðu sinni með skilaboðunum að nauðsynlegt væri að gera „skemmtilega, frumlega hluti með börnunum sínum.“

Í stuttu máli tókst tilraunin með ágætum og Rahim yngri varð einni tönn fátækari í lok uppátækisins. Til þess að taka af allan vafa segir flugpabbinn að engin hætta hafi verið á ferðum, hann hafi 13 ára flugreynslu og að tilraunin hafi verið framkvæmd við öruggar aðstæður.

Þrátt fyrir að aðrir foreldrar hafi reitt sig á hurðar, brauðristar og jafnvel dróna í sambærilegum fjarlægingum í gegnum tíðina þá telur Rick Rahim sig vera þann fyrsta sem notar flugfar í fullri stærð til verksins.

Myndbandið má sjá hér að neðan en það var fest á filmu fyrr í sumar.