Íþróttastolt 101 Reykjavíkur heldur uppskeruhátíð

Knattspyrnufélagið Mjöðmin spilar í Gulldeildinni og er „íþróttastolt 101 Reykjavíkur“. Í liðinu hefur gegnum tíðina spilað rjóminn af lista- og menningarliði miðbæjarins. Í kvöld heldur liðið upp á viðburðinn Bjúddarann á skemmtistaðnum Húrra í Naustunum, en það er ákaflega viðeigandi samastaður fyrir skemmtun skipulagða af þessu „hipstera“-liði enda þeirra helsta afdrep í miðbænum.

Á Bjúddarann er sjálfsögðu opið fyrir almenning enda eru ansi margir liðsmenn Mjaðmarinnar starfandi skemmtikraftar og því tilvalið að sameina liðsskemmtunina og eitt allsherjar dansiball. Meðal þeirra listamanna sem spila eða hafa spilað með liðinu á einhverjum tímapunkti má nefna sem dæmi DJ Margeir, Arnór Dan úr Agent Fresco og Sturlu Atlas. Búningur liðsins var hannaður af engum öðrum en Guðmundi Jörundssyni.

„Bjúddarinn er í rauninni uppskeruhátíð Mjaðmarinnar. Þar er sýnt brot af því besta úr því starfi sem hefur átt sér stað hjá leikmönnunum fyrir utan við stórkostlegan árangur liðsins. Við unnum náttúrulega B-deildina í Gulldeildinni, það náttúrulega vita það allir. Við erum að sýna hina hliðina líka. Þetta er allsherjar tónlistar- og listahátíð. Þetta er í grunninn styrktarhátíð fyrir félagsgjöldum og þátttökugjöldum í knattspyrnudeildum víðsvegar um heiminn. Ég er búinn að spila þrjú tímabil með Mjöðminni. Mjöðmin hefur gegnum árin verið svona tónlistar- og listatengt fótboltalið. Mikið grasrótar-indie-dót sem hefur komið upp úr þessu fótboltaliði,“ segir Jóhann Kristófer Stefánsson. leikmaður Mjaðmarinnar og einn af 101 Boys, hljómsveitinni hans Sturlu Atlas sem mun troða upp á Bjúddaranum.

Ásamt Sturlu Atlas munu koma fram Högni Egilsson, best þekktur sem Högni í Hjaltalín, Gunnar Ragnarsson sem hefur gert garðinn frægan í hljómsveitinni Grísalappalísu – en hann er sagður til alls líklegur – Hilmar Guðjónsson leikari mun kynna herlegheitin og síðan verður DJ Margeir á svæðinu til að þeyta skífum í hvert sinn sem þess þarf, en þó er líklegt að aðrir liðsmenn Mjaðmar verði tilbúnir til að stökkva á spilarana.

Verðið mun vera 1.500 krónur við hurð og allur ágóðinn rennur eins og áður segir í starf liðsins sem, að minnsta kosti að sögn Jóhanns, fer fram um allan heim.