Útvarpsþátturinn Skýjum ofar verður 20 ára

„Við erum að halda upp á 20 ára afmæli Skýjum ofar á kosninganótt. Við bjóðum að sjálfsögðu alla forsetaframbjóðendur og fráfarandi forseta velkomna að taka nokkur dansspor með okkur á kosninganótt. En Ólafur Ragnar Grímsson var einmitt kosinn forseti í júní 1996 þegar þátturinn Skýjum ofar hóf göngu sína og því getur hann, líkt og við, fagnað 20 árum á toppnum nú í júní.

Við höfum verið að fylgjast með kosningabaráttunni og hafa velflestir frambjóðendur talað um mikilvægi beins lýðræðis og að þeim líði vel þegar þeir heimsækja vinnustaði og umgangast almenning og það er náttúrulega fátt lýðræðislegra en að taka nokkur dansspor á kosninganótt þegar maður hefur verið kosinn nýr forseti lýðveldisins þannig að við vonumst til að sjá nýkjörinn forseta á ballinu okkar.“

Verður kosningavaka sýnd á sjónvarpsskjá hjá ykkur?

„Það stendur nú ekki til, þetta snýst meira um tónlistina og að dansa og skemmta sér. Ég veit ekki alveg hvenær fyrstu tölur koma en ef það dregst inn í nóttina þá auðvitað verðum við að bregðast við því. Við reynum einhvern veginn að upplýsa fólk sem er á dansgólfinu um hvernig staðan er.“

Er ekki við hæfi að tónlistin verði stöðvuð og að plötusnúðurinn tilkynni nýjustu tölurnar yfir dansgólfið?

„Jú, það verða tilkynningar þegar tölurnar berast.“

Í byrjunarliði kvöldsins verða Addi, Bjössi, Eldar, Ewok, Frímann, Grétar G, Plasmic, Reynir, Skeng, Tandri og Thor. Miðar fást fyrir litlar 1.500 krónur á tix.is og verður ballið haldið á Paloma klukkan 22.00.