Hjólreiðakeppnin Tour of Reykjavík haldin í fyrsta sinn 10. september

Hjólreiðakeppnin Tour of Reykjavík verður haldin í fyrsta sinn þann 10. september næstkomandi, en keppnin var kynnt á torginu við Hörpu í dag.

Boðið verður upp á fjölbreyttar hjólaleiðir en keppnin sjálf mun hefjast og ljúka í Laugardalnum. „Keppendur geta ýmist hjólað alla leið á Þingvelli eða farið styttri hringi í borginni. Fyrir yngstu keppendurnar verður boðið upp á hjólahring í Laugardalnum sjálfum,“ segir í frétt á vef Reykjavíkurborgar.

Vegalengdirnar sem um ræðir eru 105 kílómetra leið, 40 kílómetra, 13 kílómetra og svo barnabraut í Laugardalnum.

Íþróttabandalag Reykjavíkur stendur fyrir keppninni með stuðningi borgarinnar en markmið keppninnar er annars vegar að almenningur taki virkari þátt í hjólreiðaviðburðum, auk þess að efla hjólreiðar á afreksstigi hér á landi.

„Vonir standa til að þátttaka erlendra gesta aukist ár frá ári, líkt og gerst hefur með Reykjavíkurmaraþonið.

Tour of Reykjavík verður haldin annan laugardag í september ár hvert og verður rás og endamark fyrir framan Laugardalshöllina. Verðlaunaafhending mun fara fram í anddyri Laugardalshallarinnar en einungis verða veitt verðlaun til keppenda í 105 km. leið og 40 km. leið.

Leiðirnar í Tour of Reykjavík verða kynntar þegar nær dregur mótinu sjálfu, en skráning í keppnina hefst 9. júlí. Allir geta verið með og valið sér hjólahring við hæfi,“ segir í fréttinni.