Auður vonaðist hálft í hvoru eftir málssókn

Auður Jónsdóttir rithöfundur greindi vinum sínum á Facebook frá því í gær að henni hafi borist afar ógeðfelldur tölvupóstur sem endaði á hótun.

„Ég fékk hótun um málsókn í dag og afar ógeðfelldan tölvupóst sem endaði líka á hótun,“ segir Auður.

Auður fer ófögrum orðum um hestaleiguna

Vísir sagði frá því í gær að Haukur Þórarinsson í Laxnesi ætli að höfða mál á hendur Auði vegna pistlaskrifa hennar á Kjarnann, þar sem hún vandar Póra á Laxnesi, Þórarni Jónassyni föður Hauks, ekki kveðjurnar. Hún fer ófögrum orðum um hestaleiguna sem þar er rekin, þar sé illa farið með dýr og stórfelld náttúruspjöll séu í Mosfellsdal vegna starfseminnar. Pistillinn hefur verið í töluverðri dreifingu, einkum meðal stuðningsmanna forsetaframbjóðandans Andra Snæs Magnasonar, enda er pistillinn skrifaður honum til stuðnings.

Auður stendur við þau orð sín sem snúa að náttúrunni:

„En ég heyrði líka í fólki, fagfólki og fólki sem þykir vænt um náttúruna, sem sagði að ég hefði ekki farið með fleipur í (vissulega tilfinningaþrungnum) skrifum mínum um landið í Mosfellsdal – í pistli sem ég kallaði Forseti landsins. Hálft í hvoru vonast ég eftir málsókn svo að upplýsingarnar komi upp á borðið og fólk taki síðan til við að rækta upp móana fyrir alvöru.“

Sviðin jörð í Mosfellsdal

Fjölmargir senda Auði baráttukveðjur á Facebooksíðu hennar. Eins og Vísir fór yfir í frétt sinni í gær eiga þessar erjur í Mosfellsdal, milli fólksins í Laxnesi og svo Gljúfrasteini, sér sögu. Ljóst er að Auður ætlar ekki að gefa þumlung eftir því hún vekur athygli á umfjöllun Helgarpóstsins sem birtist 3. júlí 1997 þar því er haldið fram að starfsemi þessarar þá stærstu hestaleigu landsins sé „svört“. Og þá segir í þeirri umfjöllun:

„Þeir hundrað hestar sem leigan hefur á sínum snærum hafa gengið svo hart að landinu að þar má heita sviðin jörð. Í nýrri, sameiginlegri skýrslu Landgræðslunnar og Rannsóknarstofnunar landbúnaðarins segir að nær allt land í Laxnesi sé í slæmu ástandi eða alveg óhæft til beitar.“

Á sjálf góðar minningar úr Laxnesi

Í frétt Vísis í gær vandaði Haukur svo Auði ekki kveðjurnar og taldi hana trútt geta talað, rífandi kjaft í íbúð í Berlín á listmannalaunum sem skattgreiðendum er gert að rísa undir. Á Facebooksíðu Auðar myndast nokkrar umræður um þetta, meðal annars leggur Friðrik Weisshappel orð í belg og reynir að bera vopn á klæðin með því að segjast aðdáandi Auðar sem og vinur Hauks. Þau ættu að hittast yfir kaffibolla.

„Ég neita ekki að ég tók hörkulega til orða í þessum pistli,“ segir Auður, og má sjá á orðum hennar skilja að þetta eru deilur sem rista djúpt; „aðallega því ég var í töluverðu tilfinningauppnámi eftir að hafa farið út í holtið og séð hvernig það leit út. Ég á sjálf góðar minningar úr Laxnesi síðan ég var barn, þar horfði ég til dæmis fyrst á vídeó, þannig að ég skil þá sem þykir vænt um staðinn.“