Verðlauna fyrir samkennd og hugrekki í MR

Andrea Urður Hafsteinsdóttir, nýstúdent frá Menntaskólanum í Reykjavík, er handhafi nýrra samfélagsverðlauna sem voru stofnuð í hennar nafni. Andrea Urður opnaði umræðu um geðsjúkdóma innan MR og deildi eigin reynslu. Þá stóð hún fyrir fræðsluviku um þunglyndi og aðrar lyndisraskanir og fékk fyrirlesara til að fræða nemendur um geðsjúkdóma. „Þetta var ótrúlega erfitt,“ segir hún um þá ákvörðun sína að deila reynslu sinni með samnemendum sínum. „Ég hugsaði um að hætta við þetta allt saman. Ég var næstum því búin að gubba á sviðið af stressi og þetta tók á,“ segir Andrea.

Geðhjúkrunarfræðingur í 70% starfi í MR



Frásögn hennar og fræðslan sem hún stóð fyrir varð til þess að nemendur í skólanum þekktu hjá sér einkenni og leituðu aðstoðar. „Það er mikils virði að fólk sem gerði sér ekki áður grein fyrir veikindum sínum gat leitað sér hjálpar,“ segir Andrea.

Í Menntaskólanum í Reykjavík starfar geðhjúkrunarfræðingur í 70% starfi. Andrea segir það nauðsynlegt. „Það er einsdæmi að hjá framhaldsskóla sé starfandi geðhjúkrunarfræðingur. Aðgengi að sérfræðingi skiptir máli,“ segir Andrea og segir ekki nóg að ræða við námsráðgjafa um geðsjúkdóma þótt hann geti vísað fólki rétta leið.

Verðlaunin í nafni Andreu



Verðlaunin voru stofnuð í nafni Andreu Urðar af fráfarandi Inspector Scholae, Hönnu Maríu Geirdal. „Heilsa er ekkert síður mikilvæg en einkunnir. Það sem stendur eftir eftir menntaskólaárin er ekki endilega hvað þú lærðir heldur hvernig þér leið,“ segir Hanna María og segir verðlaunin verða veitt árlega til þess nemanda sem hefur skarað fram úr þegar kemur að hugrekki, heilsu, andlegri sem líkamlegri, og fyrir samkennd, væntumþykju og vináttu.

„Andreu tókst að fylla nemendakjallarann og þar stóðu nemendur og hlustuðu á skólasystur sína tala um erfiða reynslu. Að auki stóð hún að fræðslu og stuðningi fyrir nemendur skólans. Framtak hennar er ómetanlegt enda stuðlaði það að því að margir aðrir nemendur leituðu sér hjálpar.“

Nemendur beittu þrýstingi



Hanna María segist stolt af því að í MR starfi geðhjúkrunarfræðingur. „Það var vegna þrýstings frá nemendum, og rektor hefur einnig barist fyrir því að nemendur hafi aðgengi að þessari þjónustu. Aðrir skólar ættu að taka þetta sér til fyrirmyndar,“ segir Hanna María, fráfarandi inspector scholae.



 

Greinin birtist í Fréttablaðinu 1.júní