Sagt að halda sig fjarri Signubökkum vegna vatnavaxta

Íbúum Parísar hefur verið sagt að halda sig fjarri bökkum árinnar Signu vegna gríðarlegra vatnavaxta. Reiknað er með að vatnshæð árinnar rísi um sex metra í dag, en svo mikið vatnsmagn hefur ekki mælst í rúm þrjátíu ár.

Mikið úrhelli hefur verið víðs vegar um Evrópu í vikunni og samsvarar rigning síðustu þriggja daga meðalrigningu á sex vikum. Að minnsta kosti ellu manns hafa látist í flóðum í Evrópu vegna úrhellisins. Hinum heimsfrægu listasöfnum Louvre og Musee d'Orsay verða lokuð í dag svo starfsmenn geti einbeitt sér að því að bjarga listverðmætum úr kjallarageymslum safnanna.

Stjórnvöld í Frakklandi hafa lýst ástandinu vegna flóða í nokkrum héröðum landsins sem náttúruhamförum. Umhverfisráðherra Frakklands, Segolene Royal, óttast að frekari manntjón muni koma í ljós eftir að flóðin taka að réna.