Aukin áhersla á heimalestur skilar árangri

Lestrarkunnáttu barna hefur fleygt fram í Hafnarfirði eftir að ráðist var í sérstakt átak í bænum til að efla læsi. Meðal annars er nú lögð áhersla á að börn lesi heima á hverjum degi, allan grunnskólann, í stað þess að gera það bara fyrstu árin.

Ráðist var í verkefnið árið 2013. Meðal annars vegna þess að próf sýndu að íslenskum börnum gengi á þeim tíma ekki nógu vel að lesa. Einnig vegna þess að talmeinafræðingar í bænum voru að greina vanda hjá börnum strax á leikskólaaldri og töldu nauðsynlegt að aðstoða börnin sem fyrst. Meðal þeirra breytinga sem gerðar voru var að leggja meiri áherslu á heimalestur

„Heimalestur hefur alltaf verið hérna ríkjandi. Sérstaklega á fyrstu árum grunnskólans. Það má segja kannski að oft á tíðum á miðstigi þá dró úr áherslu á lestur og menn fóru að veita öðrum hlutum meiri athygli. Það sem hefur kannski breyst er að nú erum við að fá, í samvinnu við heimilin, börn til þess að lesa á hverjum degi allan grunnskólann,“ segir Helgi Gíslason sérkennslufulltrúi grunnskóla á skrifstofu fræðslu- og frístundaþjónustu Hafnarfjarðar.

Þá er lögð áhersla á að byrjað sé í leikskólum að finna hvaða börn gætu þurft á aðstoð að halda og hefja undirbúning að lestrarkennslunni þar. „Þar finnum við þau auðvitað strax þau sem eiga í erfiðleikum og byrjum að vinna strax með þeim. Þannig að þetta er algjörlega undirstaðan fyrir læsi að vinna strax með hljóðkerfisvitundina,“ segir Þórdís Helga Ólafsdóttir verkefnisstjóri yfir bættum námsárangri hjá Hafnarfjarðarbæ.

Átakið virðist vera að skila árangri. „Í 5. – 10. bekk þá mældum við síðastliðinn vetur þrisvar sinnum árangur í raddlestri, eða leshraða, og það ánægjulega gerist að frá september og til vors þá fækkar nemendum með slaka færni um helming. Það fækkar um helming í þeim hópi og nemendur með góða færni þeim fjölgar um helming. Þannig að ef að þetta er ekki góður árangur þá veit ég ekki hvað og er auðvitað þakkarvert hvernig að skólafólkið og foreldrar hafa í sameiningu, og svo nemendur sjálfir, náð þessum góða árangri,“ segir Helgi.