Skrifaði BA ritgerð um Kim og fékk selfie með henni

Jóhann Kristófer Stefánsson, sviðshöfundur, rappari, leikari og fyrirsæta var einn af þeim sem hitti Kardashian-hópinn í miðbænum á mánudaginn.

„Ég var á gangi niðri í bæ og fann á mér að meðlimir Kardashian-fjölskyldunnar væru ekki langt frá. Þannig að ég fylgdi innsæinu og gekk þar til ég rakst á þau á Bæjarins bestu. Eftir að fjölskyldan fékk sér pullu gengu þau upp í Grjótaþorp og þeim fylgdi halarófa ungmenna. Ég gekk meðferðis, enda áhugasamur leikmaður, og ekki leið á löngu áður en ég náði stuttu augnabliki við hliðina á Kim, en þá skaut ég að henni að ég hefði einmitt skrifað BA-ritgerðina mína um þáttinn hennar. Henni þótti gaman að heyra það og sagði í sínum einkennistóni: „Oh, cool,“ en Jóhann skrifaði BA-ritgerðina sína við sviðshöfundabraut í Listaháskóla Íslands einmitt um raunveruleikaþáttinn Keeping up with the Kardashians.

„Í ritgerðinni skoðaði ég þáttinn í samhengi við kenningar skoska félagsfræðingsins Ervings Goffman, sem heldur því fram að við séum alltaf í sviðsetningu á sjálfum okkur. Kardashian-fjölskyldan notar þáttinn til þess að viðhalda ímynd sinni algjörlega á sínum eigin forsendum. Þau ráða algjörlega hvernig við sjáum þau og með eftirvinnslu og klippingu manipúlera þau hvaða tilfinningar vakna upp við áhorf á þáttinn.“