Sendir samstarfsflokknum í ríkisstjórn kaldar kveðjur: „Smáflokkur með miklmennskubrjálæði“

Vilhjálmur Bjarnason, þingmaður Sjálfstæðisflokksins, vandar samstarfsflokknum í ríkisstjórn, Framsóknarflokknum, ekki kveðjurnar í aðsendri grein í Morgunblaðinu í dag. Í greininni stiklar Vilhjálmur á stóru í stjórnmálasögu Íslands og gerir meðal annars að umtalsefni kjördæmaskipan landsins til ársins 1942 sem Vilhjálmur segir að hafi verið „andlýðræðisleg“ og veitt Framsókn mikil völd:

„Það að fá meirihluta þingmanna út á 35% kjörfylgi er andlýðræðislegt,“ segir Vilhjálmur í grein sinni.

Þá rifjar hann upp breytingu á kjördæmaskipaninni árið 1942 sem hann segir að hafi sett Framsóknarflokkinn í nýja stöðu í stjórnmálunum en flokkurinn neitað að horfast í augu við breytta tíma:

„Forystumenn flokksins töldu að Framsóknarflokkurinn væri af sögulegum ástæðum jafn stór eða stærri en Sjálfstæðisflokkurinn. Svo er enn. Formaður Framsóknarflokksins sat á fyrri árum aldrei í ríkisstjórn undir forsæti sjálfstæðismanna og sagði; „allt er betra en íhaldið.“ Þau ummæli áttu eftir að erfast genetískt.“

Vilhjálmur gerir síðan að umtalsefni fylgi Framsóknarflokksins á 21. öldinni. Segir þingmaðurinn að flokkurinn hafi „rambað á barmi þess að vera smáflokkur.“

„Með lýðskrumi og ranglátri kjördæmaskipan tókst flokknum þó að fá jafnmörg þingsæti og Sjálfstæðisflokkurinn með 4000 færri atkvæði. Forseti lýðveldisins taldi að Framsóknarflokkurinn væri sigurvegari kosninga 2013. Því skyldi formaðurflokksins hafa forystu um stjórnarmyndun! Alveg nýr mælikvarði! Enn á ný lét Sjálfstæðisflokkur það yfir sig ganga að lyfta formanni Framsóknarflokksins í stól forsætisráðherra.

Þegar sá forsætisráðherra sagði af sér tilnefndi hann eftirmann sinn. Og enn lét Sjálfstæðisflokkurinn það fyrir sig ganga, jafnvel þótt hinn nýútnefndi forsætisráðherra hefði látið hafa sig hafa það níðingsverk að greiða atkvæði með því að draga fyrrverandi forsætisráðherra ogformann Sjálfstæðisflokksins fyrir Landsdóm. Nú er mál að linni. Það er ekki eðlilegt að Sjálfstæðisflokkurinn lyfti forystu Framsóknarflokksins til æðstu metorða, flokki sem er smáflokkur með mikilmennskubrjálæði,“ segir í grein Vilhjálms.