Mikilvægt að ríkisstjórnin ákveði kjördag

Forystumenn stjórnarandstöðunnar segja mikilvægt að ríkisstjórnin ákveði kjördag í haust áður en viðræður hefjast um málefnalista stjórnarflokkanna. Sigurður Ingi Jóhannsson forsætisráðherra ætlar að funda með stjórnarandstöðunni á morgun.

Forystumenn ríkisstjórnarinnar hafa boðað kosningar í haust eða um leið og búið verður að afgreiða þau mál sem ríkisstjórnin vill klára. Engin dagsetning liggur fyrir en Bjarni Benediktsson fjármálráðherra sagði í fréttum Stöðvar tvö í gær að það muni skýrast á næstum vikum.

Sigurður Ingi Jóhannsson forsætisráðherra ætlar að funda með stjórnarandstöðunni á morgun en forystumenn hennar segja mikilvægt að ríkisstjórnin ákveði kjördag sem fyrst.

„Ríkisstjórnin verður að setja niður dagsetningu og koma fram með þau mál sem hún óskar eftir því að fá afgreidd. Það er bara eðlilegur framgangsmáti í mannlegum samskiptum,“ segir Árni Páll Árnason formaður Samfylkingarinnar.

„Við viljum fá kosningar sem fyrst. Það er bara skýr krafa úr samfélaginu að þessi ríkisstjórn hefur ekki það traust sem hún þarf til þess að halda áfram,“ segir Ásta Guðrún Helgadóttir þingmaður Pírata.

Katrín Jakobsdóttir formaður VG segir eðlilegt að ríkisstjórnin upplýsi um sín áform. „Hún hefur verið furðulega loðin um þau áform og jafnvel gefið misvísandi skilaboð. Þannig auðvitað teljum við eðlilegt að þau tali skýrt um það hvað þau vilja,“ segir Katrín.

Óttarr Proppé segir stjórnmálakreppu ríkja á Íslandi. „Það er óljóst hver staðan er. Það að bæta ofaná það óvissu um það hvenær kosningar eru er mjög óráðlegt,“ segir Óttarr.