Ekki hægt að treysta völdum upplýsingum einstakra þingmanna

Þingflokksformaður Vinstri grænna telur að hagsmunaskráning þingmanna og ráðherra þurfi að vera ítarlegri en nú er og þá sérstaklega varðandi ráðherra. Þingið og almenningur geti ekki treyst á valin gögn einstakra þingmanna úr bókhaldi sínu.

Bjarni Benediktsson fjármálaráðherra og formaður Sjálfstæðisflokksins birti upplýsingar um tekjur sínar og eignir í aflandsfélaginu Falson og CO á Facebook síðu sinni seinnipartinn í gær. Þar kemur fram í yfirlýsingu frá endurskoðanda Bjarna að í skattframtali hans vegna ársins 2006 hafi eign hans í aflandsfélaginu upp á 33 milljónir verið gefin upp til skatts.

Í skattframtali vegna ársins 2009 hafi síðan verið greint frá greiðslu til Bjarna frá félaginu upp á rúmar 26 milljónir króna og ári síðar hafi félagið síðan verið afskráð. Bjarni hafi því tapað rúmum 7 milljónum á eign sinni í aflandsfélaginu.

Þá birtir Bjarni heildartekjur sínar og skattgreiðslur frá árinu 2013 til 2015 eða frá því hann varð ráðherra og eru þær á bilinu fimmtán til tæplega 18 milljónir króna á ári.

Svandís Svavarsdóttir þingflokksformaður Vinstri grænna lagði skriflega fyrirspurn í fimm liðum fyrir Einar K. Guðfinsson forseta Alþingis í gær, þar sem hann er m.a. spurður hvernig  hann hyggist bregðast við mismunandi túlkunum þingmanna á reglum þingsins um hagsmunaskráningu.

Nú hafi einn ráðherra farið úr ríkistjórn vegna Panama skjalanna en enn sitji tveir sem þar megi finna. Nokkrir þingmenn hafa birt upplýsingar um tekjur sínar og skatta undanfarna daga, þeirra á meðal Árni Páll Árnason formaður Samfylkingarinnar og Katrín Jakobsdóttir formaður Vinstri grænna.

Svandís spyr forseta Alþingis m.a. út í álit hans á því að Bjarni Beneditksson hafi ekki gert grein fyrir aflandsfélagi sínu þegar hann var óbreyttur þingmaður.

Á fundi Tryggva Gunnarssonar umboðsmanns Alþingis með stjórnskipunar- og eftirlitsnefnd Alþingis í gær kom fram að reglur um hagsmunaskráningu ráðherra eru ýtarlegri en um skráningu þingmanna í Danmörku og þurfa ráðherrar einnig að tilgreina hagsmuni maka.