Sauðfjárbændur ósáttir við lyfjaskort í landinu

Grafalvarleg staða er komin upp í sauðfjárrækt. Þrígilt bóluefni sem bændur nota við að bólusetja fé fyrir sauðburð er ekki til í landinu.

Hörgull er á ormalyfjum fyrir fullorðið fé og sýklalyf við slefu í lömbum svo gott sem uppurið. Charlotta Oddsdóttir, formaður Dýralæknafélags Íslands, segir stöðuna erfiða.

„Tribovax er þrígilt bóluefni sem sauðfjárbændur nota fyrir sauðburð við að bólusetja gemlinga. Það þarf að bólusetja tvisvar sinnum með tveggja vikna millibili og ef seinni skammturinn er ekki til er vinnan unnin fyrir gýg,“ segir Charlotta Oddsdóttir. „Þessi lyfjaskortur er svo sem ekki nýr af nálinni en kemur nú á mjög slæmum tíma,“ segir hún jafnframt. 

Stutt er í sauðburð hér á landi. Á hverju vori eru um 700 þúsund lömb borin og því í mörg horn að líta fyrir sauðfjárbændur. Sauðfjárbændur eru víðast hvar orðnir uggandi yfir því að lyf verði ekki til staðar þegar sauðburður hefst af alvöru. 

Þórarinn Ingi Pétursson, formaður Landssambands sauðfjárbænda, hefur ekki síður áhyggjur af stöðunni. „Þetta er auðvitað skandall að innflytjendur þessara lyfja skuli ekki átta sig á dagatalinu og að það sé að koma vor,“ segir Þórarinn Ingi. 

„Nú fer í hönd mikill annatími fyrir okkur sauðfjárbændur og þá skiptir gríðarlega miklu máli að í landinu skuli vera nauðsynleg lyf fyrir sauðburð.“

Charlotta segir Ísland einfaldlega of lítið markaðssvæði fyrir markaðsleyfisskyld lyf og þetta ástand einskorðist ekki einungis við dýralyf. 

„Það væri best ef við værum á sama markaðssvæði og hin Norðurlöndin. Við erum of lítið markaðssvæði fyrir þessa stóru aðila úti í heimi og við því verður að bregðast. Markaðsleyfisskyld lyf hér á landi eru mun færri en annars staðar á Norðurlöndunum,“ segir Charlotta. 

„Þetta er síðan einnig vandamál með önnur lyf og hefur maður heyrt lækna einnig tala um skort á lyfjum á sumum sviðum og það er miður,“ segir Charlotta að lokum við Fréttablaðið. 

Fréttin birtist fyrst í Fréttablaðinu 16. apríl.