Frans páfi heimsækir flóttamannabúðir á Lesbos

Frans páfi mun heimsækja grísku eyjuna Lesbos á morgun, laugardag, en tilgangur heimsóknar hans er að beina athyglinni að þeim gríðarlega fjölda flóttamanna sem kemur yfir til Evrópu á degi hverjum og býr við afar erfiðar aðstæður í flóttamannabúðum í Grikklandi og víðar.

BBC greinir frá því að Sýrlendingur í flóttamannabúðum á Lesbos hafi í dag reynt að hengja sig eftir að honum var tilkynnt að hann yrði sendur aftur til Tyrklands á grundvelli samnings landsins við Evrópusambandið sem settur var á laggirnar til að reyna að ná tökum á flóttamannastraumnum.

Maðurinn dvelur í Moria-flóttamannabúðunum en þangað er páfinn væntanlegur á morgun. Hann mun ávarpa 250 flóttamenn sem haldið er í nokkurs konar fangelsi sem staðsett er í búðunum.

Grísk yfirvöld hafa ekki staðfest að sjálfsmorðstilraun mannsins en hann er er einn af fjórum flóttamönnum í búðunum sem hafa formlega krafist þess að verða ekki sendir til baka til Tyrklands.

Helmingurinn sendur aftur til Tyrklands

4000 flóttamenn dvelja í Moria-búðunum og er talið að senda eigi 2000 þeirra til baka til Tyrklands. Samningur ESB við landið hefur verið harðlega gagnrýndur af mannréttindasamtökum þar sem talið er að tyrknesk yfirvöld hafi sent Sýrlendinga aftur til síns heima. Slíkt er að mati mannréttindasamtaka á borð við Amnesty International brot á alþjóðalögum. Tyrkland sé því ekki öruggur staður fyrir flóttamenn.

Samkvæmt samningi Tyrklands og ESB skal senda flóttamenn sem koma ólöglega inn í Grikkland aftur til Tyrklands ef þeir sækja um hæli eða ef hælisumsókn þeirra er hafnað. Fyrir hvern sýrlenskan flóttamann sem sendur er til baka skuldbindur ESB sig til að taka á móti einum Sýrlendingi sem hefur lagt fram formlega umsókn um hæli.

Þeir Sýrlendingar sem ekki fá hæli í Grikklandi verða sendir í flóttamannabúðir í Suður-Tyrklandi í stað þeirra sem verða sendir beint til Evrópu á grundvelli samningsins.

Ekki gagnrýni á samning ESB og Tyrklands

Flestir þeirra sem hingað til hafa verið sendir til baka koma frá Pakistan eða Afganistan sem eru ekki skilgreind sem stríðshrjáð lönd, líkt og Sýrland. Þó hafa Sýrlendingar einnig verið sendir til baka og fleiri munu að öllum líkindum verða sendir á næstunni.

Páfinn mun vera á Lesbos í um fimm klukkutíma. Í aðdraganda heimsóknarinnar hefur Vatíkanið lagt áherslu á að heimsóknin sé farin í mannúðar-og trúarlegum tilgangi og ekki beri að líta svo á að með henni sé páfinn að gagnrýna það að flóttamenn séu sendir aftur til Tyrklands.