Mikill missir að Einari K. segir formaður Sjálfstæðisflokksins

Bjarni Benediktsson, formaður Sjálfstæðisflokksins, segir að það sé mikill missir að Einari K. Guðfinnssyni, þingmanni flokksins og forseta þingsins, en hann tilkynnti í dag að hann ætli ekki að gefa kost á sér til áframhaldandi þingsetu. Áætlað er að Alþingiskosningar verði í haust.

„Þetta er ekki aðeins missir fyrir Sjálfstæðisflokkinn og þingflokk hans heldur fyrir þingið að sjá á eftir bæði reynslumiklum þingmanni og einstökum karakter sem hefur notið mikils trausts sem forseti þingsins,“ segir Bjarni í samtali við Vísi.

Einar tilkynnti um ákvörðun sína á Facebook-síðu sinni en aðspurður segir Bjarni að Einar hafi talað við hann áður en hann setti færsluna á samfélagsmiðilinn.

Bjarni segir að það komi honum ekki mikið á óvart að Einar skuli nú kjósa að hætta þingmennsku.

„Ég hefði sannarlega viljað njóta krafta hans áfram. Hann hefur mikið fram að færa og það sést mjög vel á hans störfum og hversu vel er tekið eftir hans framgöngu á kjörtímabilinu,“ segir Bjarni.

Eins og flestir þekkja hafa verið miklar hræringar í stjórnmálunum síðustu vikur og nú þegar gefið hefur verið út að kosið verði í haust má búast við því að fleiri tilkynni um að þeir hyggist kveðja þingið. Óttast formaður Sjálfstæðisflokksins að fleiri þingmenn eigi eftir að hætta á næstu misserum?

„Það er ekkert óeðlilegt við það að það verði endurnýjun í stjórnmálunum. Við höfum séð mikla endurnýjun í tvennum síðustu kosningum og það er eitthvað sem ég hræðist í sjálfu sér ekki neitt. Það er bara gangur lífsins í stjórnmálunum eins og annars staðar að það verða breytingar,“ segir Bjarni.

En þú sjálfur ætlar ekkert að hætta?



„Nei, ég hafði nú ekki hugsað mér það.“