Merkingar Eimskips á hjálmum fyrir skólabörn gagnrýndar: „Eimskipafélagið komið með merkið sitt, ásýnd og nærveru inn á hvert heimili landsins“

„Á meðan merki Eimskipafélagsins er á hjálmi hjólandi barns — þá er barnið hjólandi auglýsing fyrir félagið. Betri auglýsingu má varla hugsa sér,“ skrifar Guðmundur Andri Thorsson í pistli í Fréttablaðinu í dag þar sem hann gagnrýnir það að Eimskip skuli merkja fyrirtækinu reiðhjólahjálma sem það gefur 1. bekkingum um landið í samstarfi við Kiwanis-félagið. Fleiri taka undir gagnrýni Guðmunds Andra.

Annað árið í röð hefur Reykjavíkurborg komið í veg fyrir að skólabörn í 1. bekk í Reykjavík fái hjálmana að gjöf en það stangast við reglur um gjafir til barna þar sem kemur fram að gjafir sem hafa fræðslu- eða forvarnargildi megi ekki vera merktar kostunaraðila. Á hjálmunum má sjá merki Eimskips. Segja bæði Guðmundur Andri Thorsson og Andrés Jónsson almannatengill að hér sé um að ræða markaðssetningu til barna sem ekki eigi heima í skólastofunni.

„Að geta markaðssett til heimila í gegnum grunnskólabörn er hið heilaga gral í markaðsmálum“

„Með þessum hjálmum er Eimskipafélagið komið með merkið sitt, ásjónu sína og nærveru inn á hvert heimili landsins,“ skrifar Guðmundur Andri sem segir að tala megi um að börnin séu þar með orðin að hjólandi auglýsingu fyrir Eimskip en áætlað var að gefa um fjögur þúsund hjálma til skólabarna í 1. bekk.

Ólafur William Hand, upplýsinga- og markaðsfulltrúi Eimskips hefur gagnrýnt það að Reykjavíkurborg leyfi ekki að hjálmunum sé dreift í skólum Reykjavíkurborgar. Segir hann á Facebook að ástæðan fyrir því að hjálmunum sé dreift í skóla sé einföld. Það tryggi að öll börn fái hjálma og fræðsli um hvernig stilla og nota eigi hjálminn rétt.

Sjá einnig: Grunnskólabörn í Reykjavík mega ekki fá hjálma merkta Eimskipafélaginu

Bæði Guðmundur Andri og Andrés gefa lítið fyrir þessar skýringar og segja að markaðsmenn sæki mjög í að geta markaðssett til heimila í gegnum börn.

„Að geta markaðssett til heimila í gegnum grunnskólabörn er hið heilaga gral í markaðsmálum,“ skrifar Andrés á Facebook. „Það er dreifileið sem kemur markaðsskilaboðum alla leið inn í innsta ból fjölskyldna og á hluti sem verða hluti af daglegu lífi þeirra.“

Undir þetta tekur Guðmundur Andri en báðir segja þeir að það verði að gilda reglur um auglýsingar í skóla. „Ásóknin væri annars óendanleg í að fá grunnskóla til að dreifa merktu auglýsingaefni til barna,“ skrifar Andrés en Guðmundur veltir því upp hvar línan verði dregin verði fyrirtækjum leyft að koma varningi á skólabörn.

„Samfestingar í Bónuslitnum og með bleika grísnum? Kuldagallar merktir Rio Tinto Alcan?“ skrifar Guðmundur Andri. Andrés segir að lokum að ekkert banni Eimskip að dreifa merktum vörum til barna, það þurfi hinsvegar að vera gert annarstaðar en í skólastofunni.

Sjá má Facebook færslu Andrésar hér fyrir neðan og lesa má pistil Guðmundar hér.