Gögn fjarlægð af bæjarvefnum

Skjöl sem birt voru á heimasíðu Hafnarfjarðarbæjar með síðustu fundargerð bæjarráðs og vörðuðu rekstur líkamsræktarstöðvarinnar Hress hafa verið fjarlægð.

Um var að ræða fjögur skjöl; ósk Hress frá í október 2015 um að rifta samningi við Hafnarfjarðarbæ vegna reksturs líkamsræktarstöðvar við Ásvallalaug, ósamþykkta tillögu Hafnarfjarðarbæjar um lækkun leigunnar og fleira, bréf Gymheilsu frá í janúar með boði um að taka við rekstri við laugina og loks bréf lögmanns Hress frá 18. mars síðastliðinn með tillögu um uppgjör og lok samnings fyrirtækisins við bæinn.

Tillaga Hress felur meðal annars sér endurgreiðslu og niðurfellingu á leigu þannig að engin leiga verði borguð síðustu tólf mánuði leigutímans vegna vanefnda bæjarins.

„Við erum leið yfir því að tillaga okkar að uppgjöri við bæinn, sem send var í trúnaði á Sigríði Kristinsdóttur bæjarlögmann og Geir Bjarnason íþróttafulltrúa, hafi verið send til bæjarráðs og birt í heild sinni á vef Hafnarfjarðarbæjar,“ sagði Linda Hilmarsdóttir, eigandi og framkvæmdastjóri Hress, í Fréttablaðinu í gær þar sem farið var yfir málavöxtu. Nú hefur þetta skjal og önnur sem bærinn birti á vef sínum verið fjarlægt eins og fyrr segir. 

Fréttin birtist fyrst í Fréttablaðinu 2. apríl.