Sjúkraliðar sömdu

Sjúkraliðafélag Íslands (SLFÍ) og samninganefnd Sambands íslenskra sveitarfélaga náðu samningum á fjórða tímanum í nótt. Tókst þannig að afstýra fyrirhuguðu allsherjarverkfalli sjúkraliða sem annars hefði hafist á mánudag.

Mikið kapp var lagt á að ná samningum í gær en fundarmenn sátu við samningaborðið í rúmlega 19 klukkustundir áður en samningar náðust. Fundur gærdagsins var sá 12 milli samningsaðilanna.

Sjá einnig: Sjúkraliðar boða allsherjarverkfall

Sjúkraliðar höfðu boðað allsherjarverkfall frá og með 4. apríl næstkomandi og hefðu þá um 300 félagsmenn sambandsins í 72 sveitarfélögum lagt niður störf. Stærstu stofnanirnar sem verkfallið hefði bitnað á eru eru Síða á Akureyri, Brákarhlíð í Borgarfirði, Höfði á Akranesi og Ísafold í Garðabæ.

Hinn nýi samningur verður nú kynntur fyrir félagsmönnum SLFÍ áður en gengið verður til atkvæða. Sjúkraliðar samþykktu síðast nýjan kjarasamning í nóvember síðastliðnum.

Á þriðjudag liggur svo fyrir hvort félagar í níu félögum Bandalags háskólamanna (BHM) samþykkja eða hafna kjarasamningi sem gerður var við sveitarfélögin 21. mars síðastliðinn. 

Ekki náðist í Kristínu Á. Guðmundsdóttur, formann SLFÍ, við vinnslu þessarar fréttar.