Bandarískar orrustuþotur í loftrýmisgæslu

Bandarískar orrustuþotur eru komnar til landsins til að sinna loftrýmisgæslu. Bandaríkjaher hóf á föstudaginn að flytja 12 F-15C orrustuþotur til Ísland og Hollands svo og 350 hermenn úr röðum flughersins. Greint er frá þessu á vefsíðu bandarísku fréttastofunnar CNN.

Á vefsíðu Landhelgisgæslunnar kemur fram að loftrýmisgæsla Atlantshafsbandalagsins við Ísland hefjist á morgun með komu flugsveitar bandaríska flughersins. Flugsveitin kemur frá Air National Guard í Westfield í Massachusetts. Um 150 hermenn taka þátt í verkefninu svo og starfsmenn í stjórnstöð Atlantshafsbandalagsins í Uedem í Þýskalandi. Flugsveitin kom með fjórar orrustuþotur til landsins og eldsneytisbirðgaflugvél.

Gert er ráð fyrir að aðflugsæfingar verði á varaflugvöllum á Akureyri og Egilsstöðum frá þriðjudegi til fimmtudags í næstu viku. Verkefninu á að ljúka fyrir lok apríl.

Herstöð Bandaríkjamanna í Keflavík var lokað árið 2006. Síðan árið 2008 hefur Atlantshafsbandalagið séð um loftrýmisgæslu yfir Íslandi.

CNN hefur eftir  Magnus Nordenmann, yfirmanni öryggismála Atlantshafsráðsins, að auknar eftirlitsferðir Rússa á Norður-Atlantshafi með kafbátum og orrustuþotum hafi vakið athygli hersins á svæðinu á ný. Þær hafi jafnframt sýnt fram á þörfina á því að eftirlitssveitir NATO séu sýnilegar á svæðinu.