Vilja herða reglur um gjaldfrjáls bílastæði

Bílastæðanefnd leggur til að færa mörk koldíoxíðs, sem heimila fólki að leggja endurgjaldslaust í gjaldskyld bílastæði við götur Reykjavíkur, niður úr hundrað grömmum af koldíoxíði á kílómetra í blönduðum akstri í fimmtíu grömm (tengil­tvinnbifreiðar) á næsta ári. Runólfur Ólafsson, framkvæmdastjóri Félags íslenskra bifreiðaeigenda (FÍB), undrast að bílastæðanefnd vilji fara svona bratt í takmarkanir.

Fjöldi bifreiðaeigenda hefur fengið afhentar skífur fyrir visthæfar bifreiðar frá Bílastæðasjóði Reykjavíkur. Á síðasta ári voru afhentar um tvö þúsund skífur og á fyrstu tveimur mánuðum ársins höfðu verið afhentar þúsund skífur. Í ljósi þessa telur bílastæðanefnd því tímabært að þrengja reglur til að hvetja borgarbúa til að draga enn frekar úr mengun með visthæfum samgöngum. Í nýrri tillögu er einungis gert ráð fyrir að bifreiðar sem ganga fyrir rafmagni að öllu leyti eða að hluta, metanbifreiðar og vetnisbifreiðar fái gjaldfrjáls stæði. Skráð eigin þyngd bifreiða með rafgeymi/brunahreyfli, sem gefa frá sér minna en 50 grömm af koldíoxíði per kílómetra, mun þurfa að vera minni en 1.600 kg í stað 1.800 kg.

„Mér kemur í opna skjöldu að svo bratt skuli farið í þetta. Þetta verður mikil skerðing, ég hefði haldið að menn gerðu þetta í áföngum yfir lengri tíma. Það má ekki gleyma því að fjöldi einstaklinga er búinn að fjárfesta í ökutækjum sem nýta eldsneyti vel og uppfylla þessi markmið um að geta lagt endurgjaldslaust í stæði, þannig að þetta getur breytt forsendum hjá fólki,“ segir Runólfur Ólafsson.

Fréttin birtist fyrst í Fréttablaðinu 5. apríl.