Þrífur enn klósettið og verslar í Bónus

„Við skulum ekki gleyma því að það að vera frægur á Íslandi þýðir ekki að ég sleppi við að þrífa klósettið. Ég held því bara áfram og að versla í Bónus,“ sagði Ólafur Darri Ólafsson leikari í viðtali við Reykjavík síðdegis á Bylgjunni í dag. Þar var hann að svara þáttastjórnendum um hvort hann hefði fundið fyrir því að frægð hans hefði aukist eftir velgengni Ófærðar þáttanna.

Sýningu þáttanna í Bretlandi á BBC4 lauk nýverið en svo virðist sem þættirnir hafi vakið töluverða eftirtekt. Fyrir því fann leikarinn sjálfur í stuttri heimsókn sinni til London á dögunum. „Það kom fyrir tvisvar eða þrisvar að ég var stoppaður út á götu þar sem fólk var að þakka mér fyrir þættina. Ég fann að fólk var að fylgjast með og var spennt. Það er gaman að vera gera sjónvarpsefni á litla Siglufirði sem fólk svo út í hinum stóra heimi er að fylgjast með“.

Persóna í ævintýraheimi Oz

Ólafur gerði lítið út á frægðina í viðtalinu og sagði það eina jákvæða við hana vera að því meiri eftirtekt sem leikari nái að fanga, því meira val hafi hann á milli verkefna.

Ekki er búið að ræða formlega við Ólaf um framhald Ófærðar en í viðtalinu segir hann þó að það hafi alla tíð verið ósk framleiðenda, handritshöfunda og leikara að gerð yrði önnur sería.

Þessa daganna er Ólafur með annan fótinn í Búdapest þar sem tökur fara fram á bandarísku sjónvarpsseríunni  Emerald City. Sú sería gerist í ævintýraheiminum Oz sem skapaður var af rithöfundinum L. Frank Baum.  Í þátttunum fer Ólafur Darri með hlutverk persónu sem heitir Ojo hin heppni. Á meðal samleikara hans þar eru Vincent D‘Onofrio sem m.a. er þekktur fyrir leik sinn í kvikmyndinni Full metal jacket og sjónvarpsþáttunum Daredevil og Law & Order: Criminal Intent.

Hér fyrir neðan má heyra viðtalið í heild sinni.