Hóta kjarnorkuárás á Bandaríkin

Kjarnorkuflaug sést lenda í miðri Washington-borg í Bandaríkjunum í nýju myndbandi sem yfirvöld í Norður Kóreu sendu frá sér fyrr í dag.

Í myndbandinu, sem kallast Síðasta tækifærið, og má sjá hér fyrir neðan, er skautað yfir samskipti Bandaríkjanna og Norður Kóreu undir hressilegri tónlist, sem minnir helst á upphafslagið í sjónvarpsþáttunum Dallas.

Myndbandið endar svo á því að kjarnorkuflaug sést skotið frá Norður Kóreu yfir kyrrahafið þar sem hún lendir í Washington við minnismerkið um Abraham Lincon, eitt helsta kennileiti borgarinnar.

Þá er klykkt út með þeim skilaboðum að ef bandarískir heimsvaldasinnar ráðist inn á norður-kóreskt yfirráðasvæði verði því samstundis svarað með kjarnorkuárás.

Skilaboðin koma í kjölfar fyrri yfirlýsinga úr herbúðum Norður Kóreumanna, þar sem sterk staða þeirra á sviði herafla er tíunduð. Þá hefur leiðtoginn Kim Jong Un verið óspar á yfirlýsingar um hefndaraðgerðir gegn nágrannaríkinu Suður Kóreu, Bandaríkjunum og öllum öðrum ríkjum sem gerast sek um afskipti af vígbúnaði þeirra.