Stóra bomban heldur áfram: Sakar Sigmund um innherjasvik og krefst afsagnar

Ritdeila Kára Stefánssonar og Sigmundar Davíðs Gunnlaugssonar, „Stóra bomban“ hin síðari, heldur áfram. Í dag birtist í Morgunblaðinu opið bréf Kára til forsætisráðherra þar sem forstjórinn krefst þess að Sigmundur segi af sér auk þess að saka hann um innherjaviðskipti og möguleg landráð.

„[Neyðist þú] ekki til þess að standa upp úr stólnum vegna þess að Alþingi er að einhverju leyti skipað lúðulökum og lufsum, þá er ég viss um að þú munir gera það af fúsum og frjálsum vilja af því þú ert góður drengur og af því þér þykir vænt um þína þjóð,“ skrifar Kári.

Til stuðnings máli sínu bendir Kári á tvo punkta. Í fyrsta lagi bendir Kári á að Sigmundur Davíð sé einn þeirra kröfuhafa sem bera 550 milljörðum meira úr býtum en stefnt var að í upphafi. Forstjórinn segir að þar skipti engu þó að krafan hafi verið komin til vegna séreignar eiginkonu hans þar sem að reglur um innherjaviðskipti geri ráð fyrir að hagsmunir maka leið til sömu hagsmunaárekstra og þínir eigin.

„Þjóðarleiðtogi sem er að semja fyrir hönd þjóðarsinnar og hefur sem einstaklingur hagsmuna að gæta með þeim sem hann er að semja við og gegn þjóðinni er óhæfur til þess að sinna starfi sínu og ef hann heldur því leyndi má leiða að því rök að hann hafi orðið uppvís að landráðum,“ skrifar Kári.

Rifjar upp mál Baldurs Guðlaugs

Í öðru lagi telur Kári að sú staðreynd að Sigmundur Davíð hafi haft innsýn í möguleg framtíðarverðmæti kröfu sinnar feli í sér að hann sé sekur um innherjaviðskipti. Líkir Kári máli Sigmundar meðal annars saman við mál Baldurs Guðlaugssonar, fyrrverandi ráðuneytisstjóra fjármálaráðuneytisins.

„Nú er líklegt að það séu þeir bæði í pólitík og utan sem mér eru ósammála um það sem ég hef sagt í þessu bréfi vegna þess að þú átt vegna verðleika þinna stuðningsmenn og aðdáendur út um allt en það er næsta víst að margir koma til með að sjá þetta svipuðum augum og ég. Þar af leiðandi kemurðu til með að hrekjast úr embætti að endingu þótt þú berjist gegn því með kjafti og klóm,“ segir í niðurlagi opna bréfsins.

Stóra bomban hinni fyrri átti sér stað árið 1930 en það var ritdeila Jónasar Jónssonar frá Hriflu, þáverandi dómsmálaráðherra fyrir Framsóknarflokkinn, og Helga Tómassonar yfirlæknis á Kleppi. Þó að efnistök þeirrar deilu hafi verið önnur eru atvik svipuð að hluta þar sem um ráðherra Framsóknarflokksins og læknir eru þátttakendur. Opinn pennavinskapur Kára og Sigmundar hefur einnig staðið yfir í talsvert lengri tíma.