Alvarleg staða blasir við leikskólum í Reykjavík vegna niðurskurðar

Leikskólastjórnendur segja nær ómögulegt að spara jafn mikið á þessu ári og borgin vill. Búið sé að skera allt niður sem hægt er í starfi skólanna. Til enn frekari sparnaðar sjá þeir fram á að þurfa að senda börnin heim þá daga sem er undirmannað.

Tæpir tveir mánuðir eru síðan borgarstjórn samþykkti að skera niður fjármagn til skóla- og frístundasviðs næstu tvö árin. Strax á þessu ári er gerð krafa um að 670 milljóna króna hagræðingu verði náð fram. Þessi ákvörðun borgarstjórnar leggst illa í leikskólastjórnendur sem hafa síðustu vikurnar legið yfir rekstri skóla sinna og reynt að finna leiðir til að spara. „Þegar ég er að vinna í fjármálauppgjörinu einu sinni í mánuði þá hellist yfir mig: Nú hætti ég,“ segir Jónína Lárusdóttir, leikskólastjóri í Klömbrum.

Krafan um hagræðingu á þessu ári kemur sérstaklega illa við leikskólana þar sem nýjar reglur gera ráð fyrir að reksturinn geti verið í mínus í byrjun árs þar sem halli færist á milli ára. Jónína segir sinn rekstur hafa verið í tæpum tveimur milljónum í mínus í byrjun árs. Svo sé gerð krafa um að hún spari hátt í milljón. Hún hefur þrjátíu ára reynslu sem leikskólastjóri og segir nær ómögulegt að spara jafn mikið og borgin vill. Það sem ég sé að ég mun gera að ég mun senda börnin heim þegar það eru veikindi.

Hún segir kostnaðarsamt fyrir leikskólana að kalla út fólk vegna veikinda eða frídaga. Í dag voru fjórir starfsmenn til að mynda veikir og nokkrir í fríi. „Ef við sendum þau heim erum við ekki að skerða þjónustu við börnin. Það lendir á foreldrum kannski sem þurfa að taka sér frí úr vinnu.“

Leikskólastjórnendur í Reykjavík sjá almennt ekki hvernig þeir geti sparað jafn mikið og borgin vill. Þeir eru flestir uggandi yfir ákvörðun borgarinnar.

Helgi Grímsson sviðstjóri skóla- og frístundasviðs borgarinnar sagði í samtali við fréttastofu að hann hefur skilning á áhyggjum leikskólastjórnenda. Verið væri að kanna hvaða leiðir verði farnar til að ná fram sparnaði. Til að mynda sé hægt aðstoða leikskólana við að gera hagkvæmari innkaup og hægt sé að fara í útboð við kaup á hreinsisvörum, pappír og matvörum.

Jónína segir að fyrst að það þurfi að spara sé æskilegast að stytta opnunartíma eða sumarfrí. Slíkt komi ekki niður á þjónustu við börnin en stjórnendur borgarinnar vilji ekki fara slíkar leiðir.