Hópur eldri borgara íhugar málsókn vegna ágreinings um húsgjöld

Hópur íbúa í þjónustu og öryggisíbúðum Naustavarar í Kópavogi íhuga að höfða mál á hendur félaginu vegna ágreinings um hússjóð. Íbúarnir saka félagið um að nota sjóðinn til að standa straum af óskyldum kostnaði en heildarupphæðin hleypur á milljónum króna.

Íbúðirnar sem eru við Boðaþing í Kópavogi eru sérhannaðar fyrir eldra fólk. Fyrstu íbúarnir fluttu inn árið 2010 og eru þeir nú um 120 talsins. Um er að ræða leiguíbúðir sem félagið Naustavör á og rekur.

Íbúar greiða mánaðarlega tæpar fjórtán þúsund krónur í hússjóð en deilur um greiðslur úr sjóðnum hafa staðið yfir í nokkur ár.

Hópur Íbúa telur að Naustavör hafi notað hússjóðinn til að standa straum af óskyldum kostnaði. Peningarnir hafi meðal annars verið notaðir til að standa undir stjórnunarkostnaði, rekstri púttvallar og eftirlitskerfa á svæðinu. Kostnaðurinn hleypur á milljónum króna.

Að mati þessara íbúa ætti húsaleigan að standa undir þessum kostnaði enda sé hún hærri en á almennum leigumarkaði.

Málinu var á síðasta ári skotið til kærunefndar húsamála sem komst að þeirri niðurstöðu að félagið hefði ekki heimild til að innheimta þessa kostnaðarliði með húsgjöldum. Naustavör hefur hins vegar ákveðið að fara ekki eftir þessari niðurstöðu og því íhuga íbúar nú að höfða mál á hendur félaginu.

Pétur Kjartansson lögfræðingur hefur aðstoðað íbúana í málinu.

„Íbúarnir vilja að Naustavör endurgreiði það sem félagið hefur oftekið í formi húsgjalda á undanförnum 3 til 4 árum sem eru verulegar fjárhæðir og skiptir íbúana miklu máli. Þetta er tekið með ólögmætum hætti og þeim ber að skila því,“ segir Pétur.

Hann furðar sig á því að félagið hafi ákveðið að virða að vettugi niðurstöðu kærunefndar og segir að margsinnis hafi verið reynt að leita sátta í málinu en án árangurs.

„Þeir hagsmunir sem vegast á hérna eru annars vegar varðir af gróðafélagi sem að Naustavör er. Þetta er bara húsaleigufélag sem er sveipað í umbúðir góðsemi og gæsku en þetta er ekki annað en harðsvírað gróðafélag. Hins vegar er hópur gamals fólks sem að kærir sig ekki um að standa í illdeilum. Er komið á stað þar sem fer vel um það. Þetta er fínt hús og það er vel hugsað um þau og það líður öllum vel. En það er engum manni bjóðandi á þessum aldri að þurfa að standa í málaferlum við leigusala sinn,“ segir Pétur.

Sigurður Garðarsson framkvæmdastjóri Naustavarar segir að félagið sé rekið án arðsemismarkmiða og sé í eigu góðgerðarfélagsins Sjómannadagsráðs. Félagið telur að leigusamningar sem leigutakar hafa undirritað séu löglegir enda séu þeir gerðir með upplýstu samþykki leigjenda. Þess vegna snúist þetta mál fyrst og fremst um lagalega óvissu. Hann harmar ennfremur þá stöðu sem upp er komin.