Segir Gunnar Braga fara með helber ósannindi: „Aldrei átt eða selt fiskveiðikvóta“

Lilja Rafney Magnúsardóttir, þingmaður Vinstri grænna, segir hvorki hana né eiginmann hennar hafa átt eða selt fiskveiðikvóta. Þetta segir Lilja í yfirlýsingu sem hún birtir á Facebook-síðu sinni vegna orða Gunnars Braga Sveinssonar utanríkisráðherra í Morgunútvarpinu á Rás 2 í morgun.

Lilja segir Gunnar Braga hafa haldið því fram að hún hefði ekki gert grein fyrir hagsmunum sínum um kvótasölu sína og fjölskyldu hennar þegar hún barðist fyrir breytingum á fiskveiðistjórnarkerfinu á síðasta kjörtímabili.

Hún segir fósturföður hennar hafa verið hættan smábátaútgerð sökum aldurs þegar hún tók sæti á Alþingi árið 2009 og að faðir hennar ,sem var sjómaður og átti smábát, hafi fallið frá árið 1997.

„Engir beinir eða óbeinir einkahagsmunir lágu því undir þegar Lilja Rafney barðist fyrir breytingum á kvótakerfinu, aðeins hagsmunir almennings,“ segir Lilja Rafney í yfirlýsingunni.

Hún segir Gunnar Braga leitast eftir að afvegaleiða umræðuna um hagsmuni Sigmundar Davíðs Gunnlaugssonar forsætisráðherra og eiginkonu Önnu Sigurlaugar Pálsdóttur með orðum sínum í Morgunútvarpinu.

„Og heldur fram helberum ósannindum um undirritaðan þingmann í því skyni að gjaldfella málflutning hans á þingi og í þjóðfélagsumræðunni og drepa á dreif gagnrýni á forsætisráðherra,“ segir í yfirlýsingu Lilju Rafneyjar sem má lesa hér fyrir neðan: 

Yfirlýsing Lilju Rafneyjar Magnúsardóttir alþingismanns.Vegna orða Gunnars Braga Sveinssonar utanríkisráðherra í morgun...

Posted by Lilja Rafney Magnúsdóttir on Thursday, March 17, 2016