Innlent

Áfram rætt um aflandsfélagið: Upplýsa skal um hagsmunaárekstra samkvæmt siðareglum þingmanna

Bjarki Ármannsson skrifar
Þingmaður Vinstri grænna vekur athygli á nýsamþykktum siðareglum þingmanna í samhengi við mál dagsins í dag.
Þingmaður Vinstri grænna vekur athygli á nýsamþykktum siðareglum þingmanna í samhengi við mál dagsins í dag. Vísir

Siðareglur Alþingismanna voru samþykktar á þingi í dag. Reglurnar hafa verið í vinnslu frá því fljótlega eftir að ríkisstjórn Samfylkingar og Vinstri grænna tók við árið 2009 en voru lagðar fram á síðasta þingi.

Reglurnar eru í tuttugu liðum en í þeim er meðal annars kveðið á um að þingmenn skuli við störf sín forðast árekstra milli almannahagsmuna og fjárhagslegra hagsmuna þeirra. Skipti þá engu hvort hagsmunirnir séu tengdir fjölskyldu þeirra eða persónulegir, raunverulegir eða hugsanlegir. Takist þingmanni ekki að koma í veg fyrir hagsmunaárekstra af þessu tagi, skuli hann upplýsa um þá.

Svandís Svavarsdóttir, þingmaður Vinstri grænna, vekur sérstaklega athygli á 8. grein reglnanna, sem kveður á um þetta, á Facebook-síðu sinni í dag. Gera má því skóna að Svandís sé með því að vísa til máls Önnu Sigurlaugar Pálsdóttur, eiginkonu Sigmundar Davíðs Gunnlaugssonar forsætisráðherra, sem var mikið rætt á þingi í dag.


"8. gr. Þingmenn skulu við störf sín forðast árekstra milli almannahagsmuna og fjárhagslegra hagsmuna þeirra eða...

Posted by Svandís Svavarsdóttir on 16. mars 2016

Anna Sigurlaug, sem jafnan er kölluð Anna Stella, greindi frá því í ítarlegri færslu um fjármál sín í gær að hún ætti erlent félag, sem héti Wintris, sem héldi utan um fjölskylduarf hennar. Hún segir félagið alfarið í hennar eigu og að það hafi greitt alla skatta á Íslandi en aldrei fjárfest þar.

Svandís Svavarsdóttir, þingmaður Vinstri grænna, vekur sérstaklega athygli á 8. grein reglnanna á Facebook-síðu sinni í dag. Vísir/GVA

Greint var frá því í dag að félagið væri á Bresku Jómfrúareyjum, þar sem stærsta eyjan er hin fræga Tortola, og að það hefði gert kröfur í alla föllnu bankana, alls um 500 milljónir.

Björn Valur Gíslason, varaformaður Vinstri grænna og varaþingmaður flokksins, gerði málið að umræðuefni á Alþingi í dag. 

„Á meðan íslenskur almenningur, fjölskyldur og heimili, þurftu í gegnum hrunið og í kjölfar þess að berjast frá degi til dags til að halda heimili sínu gangandi innan gjaldeyrishafta og fallinnar krónu og reyna að standa í skilum með skuldbindingar sínar; voru forsætisráðherrahjónin að höndla með fjölskylduauðinn í erlendum skattaskjólum,“ sagði Björn Valur. 

„Á sama tíma og forsætisráðherrann krafðist þess ítrekað úr þessum ræðustól á síðasta kjörtímabili að fá að vita hverjir væru raunverulegir eigendur bankanna, hverjir kröfuhafarnir væru, hrægammarnir, þá var hann einn af þeim.“

Ummæli Björns Vals vöktu mikla gremju stjórnarþingmanna, innan jafnt sem utan þingsals.

Karl Garðarsson, þingmaður Framsóknarflokksins, er einn þeirra sem gagnrýnt hefur Björn Val fyrir ummælin.


Björn Valur Gíslason, varaformaður Vinstri grænna, hefur prívat og persónulega tekið að sér að losa VG við þau 2,9% sem...

Posted by Karl Garðarsson on 16. mars 2016

Orðrétt segir í 8. grein siðareglnanna: „Þingmenn skulu við störf sín forðast árekstra milli almannahagsmuna og fjárhagslegra hagsmuna þeirra eða annarra hagsmuna sem eru faglegir, persónulegir eða tengdir fjölskyldu þeirra, hvort sem þeir eru raunverulegir eða hugsanlegir. Leysa skal úr slíkum málum með almannahagsmuni að leiðarljósi. Takist þingmanni ekki að koma í veg fyrir hagsmunaárekstra af þessu tagi skal hann upplýsa um þá.“

Anna Sigurlaug, sem jafnan er kölluð Anna Stella, greindi frá því í ítarlegri færslu um fjármál sín í gær að hún ætti erlent félag, sem héti Wintris, sem héldi utan um fjölskylduarf hennar. Vísir/Valli

Fram hefur komið á Kjarnanum í dag að sá miðill hafi ítrekað beint fyrirspurnum til upplýsingafulltrúa ríkisstjórnarinnar þar sem óskað var eftir upplýsingum um hvort ráðherrar í ríkisstjórn Íslands, eða fjölskyldur þeirra, ættu eignir erlendis. Forsætisráðuneytið neitaði að svara fyrirspurnunum.

Anna Stella Pálsdóttir er með ríkustu konum landsins. Hún segir í Facebook-færslunni frá í gær umræðu um persónuleg mál sín og fjölskyldu sinnar í samhengi við störf forsætisráðherra byrjaða „enn og aftur.“ Hún segist því vilja hafa „staðreyndirnar réttar,“ vilji fólk ræða mál hennar á annað borð. 

Í lok færslunnar kallar hún eftir því að fólk gefi „Gróu á Leiti smá frí.“ Fjármál Önnu Stellu hafa ekki verið til umfjöllunar í fjölmiðlum að undanförnu en samkvæmt heimildum Vísis er færslan sett inn nú til að bregðast við umræðu um félagið sem komið hefur upp allra síðustu daga.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.