Skora á borgina að draga til baka hagræðingakröfu

Foreldrafélög grunnskóla í Breiðholti skora á borgaryfirvöld að draga til baka hagræðingakröfu sem sett hefur verið á skóla- og frístundasvið þannig að tryggt sé að skólarnir geti sinnt sínum lögboðnu skyldum. Ef boðaður niðurskurður nái fram að ganga sé meðal annars fyrirséður enn frekari samdráttur sérkennslu í grunnskólum.

Þetta kemur fram í ályktun frá stjórnum félaganna sem taka heilshugar undir ályktun Félags skólastjórnenda í Reykjavík vegna fjárhagslegrar stöðu grunnskóla í borginni og skertrar þjónustu við nemendur.

Sjá einnig: Hagrætt fyrir 1.780 milljónir króna

„Niðurskurður fjármagns til skólastarfs hefur nú þegar verið umtalsverður síðustu misseri og er svo komið að grunnþjónusta á mjög undir högg að sækja. Sérkennsla hefur dregist saman og allur stuðningur til barna með hvers konar sérþarfir sömuleiðis,“ segja félögin.

Þá segir jafnframt að notendur þjónustu skólanna séu börn sem eigi allt sitt undir ákvörðunum fullorðinna, en hafi engar leiðir til áhrifa á þær ákvarðanir. Ef vel sé búið að menntun barna í skólaumhverfi muni þau endurgjalda það margfalt.

„Við sem störfum í sjálfboðastarfi í foreldrafélögum skólanna störfum eftir þessari hugsjón, að vera málsvarar barnanna og búa börnum hverfisins gott skólaumhverfi, og skorum við á borgina að standa vel að sínu hlutverki gagnvart börnum borgarinnar.“

Undir ályktunina rita foreldrafélög í Breiðholtsskóla, Fellaskóla, Hólabrekkuskóla, Seljaskóla og Ölduselsskóla.