Seðlabankinn þrisvar brotið jafnréttislög á skömmum tíma

Kærunefnd jafnréttismála hefur í þrígang á þremur árum komist að þeirri niðurstöðu að Seðlabanki Íslands hafi brotið gegn lögum um jafna stöðu og jafnan rétt kvenna og karla. Sami starfsmannastjóri hefur starfað hjá bankanum yfir tímabilið sem um ræðir.

Kvenumsækjandi kærði til jafnréttisnefndar í lok árs 2012 að karl hefði verið ráðinn í starf sem hún sótti um, en hún taldi sig vera hæfari. Kærunefnd komst að þeirri niðurstöðu að konan hefði verið að minnsta kosti jafn hæf til að gegna starfinu. Konur í starfi sérfræðings hjá kærða voru umtalsvert færri og bar því Seðlabankanum að leitast við að jafna stöðu kynjanna hvað þau störf varðaði.

Úrskurðað var um tvö mál í lok október 2015. Tvær konur kærðu að byrjunarlaun þeirra væru ákvörðuð lægri en karlmanns. Öll þrjú voru ráðin í jafnverðmætt starf en konurnar greindu frá því að þær hefðu fengið 17 prósent álag á laun sín en karlmaðurinn 32,4 prósent.

Konurnar voru ráðnar í stöðu sérfræðings í undanþágudeild gjaldeyriseftirlits Seðlabanka Íslands en karlinn var ráðinn í stöðu sérfræðings í rannsóknardeild gjaldeyriseftirlitsins á sama tíma.

Samkvæmt úrskurðinum greindi Seðlabankinn frá því að ákvörðun um álag á laun þeirra hafi verið byggð á hlutlægum viðmiðum á grundvelli upplýsinga úr umsókn og starfsviðtali. Niðurstaða kærunefndar var að Seðlabankanum hefði ekki tekist að sýna fram á að launamunurinn væri byggður á öðru en kynferði.



Ein kvennanna sem kærði til kærunefndar jafnréttismála segir að hún viti fyrir víst að brotið hafi verið á fleirum. Í upphafi hafi þær verið fleiri í kæruferlinu sem töldu að hefði verið brotið á sér. Hún segist jafnframt vita að kynbundinn launamismunur viðgangist enn þá innan Seðlabankans.

Heimildarmaður segir að málið hafi ekki verið rætt innanhúss við starfsmenn. Bankinn hafi ekki upplýst starfsmenn um til hvaða ráðstafana hann hyggst grípa ef önnur sambærileg mál koma upp og ekkert rætt um niðurstöðu úrskurðanna við starfsmenn. 



Sérfræðingarnir tóku allir til starfa þann 1. maí 2014. Karlmaðurinn fékk launahækkun við fastráðningu 1. nóvember 2014. Önnur konan fékk ekki fastráðningu og hætti störfum, en hin konan fékk launahækkun við fastráðningu þann 1. febrúar 2015.

Óskað var eftir viðbrögðum frá Seðlabankanum vegna málsins. Þau svör fengust að málin hefðu verið yfirfarin innan bankans og viðeigandi lærdómar dregnir. Þá hafi þeim verið lokið í sátt við viðkomandi aðila.