Er það skaðlegt heilsunni að vera með „hangandi haus“ yfir snjallsímanum?

Að vera háður snjallsímanum gæti haft bein áhrif á lundarfar fólks því tengsl eru á milli þess að vera hokinn og þunglyndur. Álag á háls eykst um 27 kíló þegar meðalmaðurinn hallar sér fram um sextíu gráður til að líta á snjallsímann.

Nútímamaðurinn er háður snjallsímanum og hvert sem litið er er fólk að halla sér yfir tækin. Menn eru orðnir svo uppteknir af þessum tækjum að borgaryfirvöld í Stokkhólmi fundu sig knúin til að setja upp þessi umferðarskilti sem vara ökumenn við gangandi vegfarendum sem séu svo niðursokknir í snjallsímana sína að þeir sjái kannski ekki bíla á ferð.

Fjallað var um málið nýlega í New York Times með fyrirsögninni: Hvernig snjallsíminn er að eyðileggja líkamsstöðu þína og lundarfar.

Meðal mannshöfuð vegur fjögur og hálft til fimm og hálft kíló. Þegar við beygjum hálsinn um 60 gráður, eins og við gerum þegar við höllum höfðinu yfir snjallsímann, eykst álag á hálsinn um um það bil 27 kíló.

Þegar manneskjan er þunglynd er hún niðurlút og rannsóknir hafa leitt í ljós að einstaklingar sem glíma við þunglyndi þróa með sér líkamsstöðu þar sem þeir eru hoknir. Ein slík sem birtist í Brasilíu fyrir tæpum sex árum leiddi ljós að þunglyndissjúklingar væru líklegri til að standa hoknir með höfuðið beygt fram og hendur upp að líkamanum.

Þá hefur verið sýnt fram á tengsl milli líkamsstöðu og minnis. Niðurstöður rannsóknar sem birtust í Bandaríkjunum fyrir tveimur árum sýndu fram á að þeir sem glíma við þunglyndi eru líklegri til að muna neikvæðar minningar og hluti fremur en jákvæða ef þeir sitja niðurlútir en ef þeir sitja uppréttir.

Þetta er andlega hliðin en hefur það einhver bein líkamleg áhrif að vera stóran hluta dagsins að vera með beygðan háls yfir snjallsímanum? Við leituðum svara hjá Birni Zoëga bæklunarskurðlækni en hans sérsvið er hryggjarskurðlækningar.

Hvaða áhrif hefur það á hálsinn og hryggjarsúluna að vera lengi hokinn yfir snjallsíma? „Það er óvíst hvaða áhrif það hefur til lengri tíma en þetta veldur auknu álagi á bæði vöðvana og liðina,“ segir Björn. Hann segir að leiða megir líkur að því að menn geti valdið sér eymslum með því að vera með hangandi haus stóran hluta dags.

„Maður á að reyna að hlusta á líkamann en það má líka minna á að það er vel þekkt að allar stöður á líkamanum, ef þú ert í óeðlilegri stöðu, þær valda þreytu og geta valdið vöðvabólgu.“