Allir taka undir í lokin

„Á þessum tónleikum koma fram fyrrverandi og núverandi nemendur og kennarar skólans úr nærumhverfinu. Þetta verður heilmikið húllumhæ,“ segir Hjörleifur Örn Jónsson, skólastjóri Tónlistarskólans á Akureyri, um hátíðartónleika í Hömrum í kvöld. Þeir eru fyrsti stórviðburðurinn í tilefni 70 ára afmælis skólans.

„Meðal þess sem flutt verður er nýtt afmælislag sem við fengum að gjöf frá tveimur eðalmönnum, þeim Daníel Þorsteinssyni og Hjörleifi Hjartarsyni. Söngkennararnir ætla að frumflytja það og kenna fólki það á staðnum svo það geti tekið undir í lokin,“ lýsir Hjörleifur Örn. „Við ætlum svo að bjóða upp á léttar veitingar eftir tónleikana svo þetta verður hugguleg kvöldstund.“

Á döfinni eru heimsóknir nemenda og kennara skólans í alla leik-, grunn- og framhaldsskóla Akureyrar, að sögn Hjörleifs Arnar.

„Það er afmælisgjöf okkar til skóla bæjarins,“ segir hann og nefnir næsta afmælisviðburð sem verður á degi tónlistarskólanna, 15. febrúar. Um er að ræða stórtónleika með hljómsveitinni 200.000 naglbítum í Hamraborg þar sem allir nemendur skólans, um 400 talsins, koma fram og leika útsetningar Daníels Þorsteinssonar með Villa og félögum. Þriðji stórviðburðurinn er fyrirhugaður með Sinfóníuhljómsveit Íslands í lok árs.

Tvennt annað er verið að gera í tilefni afmælisins, að sögn Hjörleifs Arnar; endurgera vefsíðuna og grúska í sögu skólans. „Við erum í samstarfi við Jón Hlöðver Áskelsson sem var skólastjóri hér og þekkir söguna út og inn og erum að móta hugmyndir um að setja saman margmiðlunarsýningu, hún er á vinnslustigi.“

Hjörleifur Arnar tók við embætti skólastjóra Tónlistarskóla Akureyrar rétt fyrir hrun 2008. „Ég flutti hingað heim frá Berlín beint í niðurskurðinn,“ segir hann. „Stjórnunin hefur verið krefjandi verkefni en á sama tíma skemmtilegt.“