Innlent

Beitti konu sína ofbeldi eftir ásakanir um framhjáhald

Kolbeinn Tumi Daðason skrifar
Árásin átti sér stað á heimili parsins að loknum dansleik en þau sökuðu hvort annað um framhjáhald umrætt kvöld.
Árásin átti sér stað á heimili parsins að loknum dansleik en þau sökuðu hvort annað um framhjáhald umrætt kvöld. Vísir/Getty
Hæstiréttur hefur staðfest fimm mánaða skilorðsbundinn fangelsisdóm Héraðsdóms Reykjaness yfir manni fyrir líkamsárás á þáverandi sambýliskonu aðfaranótt sunnudagsins 1. september 2013. Árásin átti sér stað á heimili þeirra að loknum dansleik en þau sökuðu hvort annað um framhjáhald umrætt kvöld. 

 Í ákæru er háttsemi mannsins lýst þannig að hann hafi slegið konuna hnefahöggi í andlitið, hent henni utan í svefnherbergisskáp, hrint henni svo að hún hafi fallið og lent með vinstri öxlina á kommóðu, tekið í hönd hennar og sparkað, klæddur skóm, í vinstra læri hennar, sparkað í hægri kálfa hennar og síðu, tekið hana hálstaki með báðum höndum og hent henni utan í vegg og ýtt með höndunum á bringu hennar þannig að hún féll aftur fyrir sig og lenti á glerborði. 

 Taldi Hæstiréttur, ólíkt dómi í héraði, ósannað að maðurinn hefði hent konunni utan í svefnherbergisskáp og sparkað í hana. Þá var í héraði ekki fallist á að hún hefði verið tekin hálfstaki.

 Hlaut konan tvö rifbeinsbrot, sár og mar á hægri olnboga, mar á vinstri öxl, utanverðu lægri og utanvert á hné. Maðurinn neitaði sök fyrir dómi en viðurkenndi að hafa ýtt við brotaþola þannig að hún hafi fallið á sófaborð og sófa.

 Ótrúverðugur vitnisburður mannsins

 Maðurinn og konan höfðu verið við drykkju yfir daginn og svo haldið saman á dansleik. Maðurinn sagðist hafa séð konu sína kyssa annan mann og því haldið heim á leið, sagst vera búinn að gefast upp á konunni, ætlað að flytja út og því byrjað að pakka niður í tösku. Konan sagðist hafa heyrt í gegnum þriðja aðila að maðurinn teldi sig halda framhjá sem væri ekki satt. Við heimkomu sakaði hún manninn um framhjáhald. Þá hafi maðurinn brugðist við með ofbeldi.



Í dómi héraðdóms frá í fyrra segir að verknaðarlýsingin úr ákærunni samrýmist áverkavottorði sem fengið var hálfum sólarhring eftir árásina að frátöldu því að ekkert kom fram um að konan hefði kennt sér meins í hálsi eftir hálstak. Myndir af heimilinu sýndu að atburðarás sem maðurinn lýsti væri mjög ótrúverðug og að engu hafandi. Það styddi ekki frásögn hans.

 Þá þótti vitnisburður vinkvenna konunnar og dóttur, sem komu á vettvang ásamt lögreglu að beiðni konunnar, auk framburðar konunnar og áverkavottorð telja lögfulla sönnun að maðurinn hefði veist að konunni. Maðurinn hefur ekki verið dæmdur áður og þótti fimm mánaða fangelsi, skilorðsbundið til tveggja ára, hæfilegur dómur. Konan fór fram á eina milljón króna í miskabætur en dómurinn ákvað að hálf milljón væri hæfileg upphærð.

 Dómur Hæstaréttar


Tengdar fréttir

Sökuðu hvort annað um framhjáhald

Karlmaður á fimmtugsaldri hefur verið dæmdur í fimm mánaða skilorðsbundið fangelsi fyrir líkamsárás á þáverandi sambýliskonu aðfaranótt sunnudagsins 1. september 2013.

Mest lesið


Fleiri fréttir

Sjá meira


×

Mest lesið