Borgarstjóri segir heimsenda matinn af bestu gæðum og miklu lystugri en hann bjóst við

Dagur B. Eggertsson borgarstjóri segir að heimsendur matur til eldri borgara í höfuðborginni vera af bestu gæðum og reyndar miklu lystugri og betri en hann hafði nokkurn tímann búist við.

Dagur segir frá því á Facebook-síðu sinni að eftir umræðu síðustu viku hafi honum leikið forvitni á að vita hvernig heimsendi maturinn væri og því fengið matinn sendan í ráðhúsið þessa vikuna.

„Þetta er matur sem er kældur og sendur í bökkum og maður hitar í örbylgjunni þegar hentar. Ég missti reyndar miðvikudaginn úr, en á mánudaginn var þessi fíni lax, á þriðjudaginn var svikinn héri í ráðhúsinu en ég fékk sendan hamborgarhrygg og súkkulaðibúðing með rjóma í eftirrétt og í gær voru kjötbollur, en reyktur lax í forrétt.

Ég borða að vísu allan venjulegan heimilismat og kvarta sjaldan en verð að segja að þessi heimsendi matur er af bestu gæðum og reyndar miklu lystugri og betri en ég bjóst nokkurn tímann við, eftir að hafa lesið alls kyns stóryrði um hann á netinu.“

Borgarstjórinn segist halda að fæstir sem þannig tala hafi raunverulega smakkað matinn.

Hann segist svo hafa endað vikuna á að fara í heimsókn í eldhúsið á Lindargötu sem eldi allan matinn og pakkar þar sem hann þakkaði fyrir sig. „Þar ræður Bragi kokkur ríkjum en hann hefur starfað hjá borginni í meira en 35 ár. Allt skipulagið í eldhúsinu er til fyrirmyndar, hráefnið er gott og maturinn bragðast vel (fékk sviðasultu og rófustöppu í tilefni bóndadagsins). Ofan á gæðin er verðið lægra en gerist og gengur í nágrannasveitarfélögum,“ segir Dagur.

Eftir umræðu síðustu viku lék mér forvitni á að vita hvernig heimsendi maturinn væri sem eldra fólki stendur til boða í...

Posted by Dagur B. Eggertsson on Saturday, 23 January 2016