Mikilvægur sigur hjá lærisveinum Rúnars

Balingen-Weilstetten, sem Rúnar Sigtryggsson þjálfar, vann afar mikilvægan sigur á Melsungen, 29-25, á heimavelli í þýsku úrvalsdeildinni í handbolta í kvöld.

Þetta var þriðji sigur Balingen í síðustu fimm leikjum en liðið er komið upp í 13. sæti deildarinnar með sjö stig.

Rúnar Kárason skoraði fjögur mörk fyrir Hannover-Burgdorf sem bar sigurorð af Erlangen, 30-25, á heimavelli.

Hannover er í 6. sæti deildarinnar en liðið hefur unnið þrjá af síðustu fjórum leikjum sínum.

Rúnar skoraði tvö mörk úr fjórum skotum utan af velli og nýtti bæði vítaköstin sem hann tók.