Innflytjendur þurfa meiri stuðning í skólanum

Gögn Hagstofunnar sýna að rúm 95 prósent sextán ára ungmenna sóttu framhaldsskóla haustin 2012 og 2013. Skólasókn var minnst meðal innflytjenda, eða rúmlega 86 prósent, og tæp 65 prósent voru í skóla við 18 ára aldur.

Þrátt fyrir að nemendum af erlendum uppruna hafi fjölgað hratt í íslensku skólakerfi er aðeins eitt skyldunámskeið í fimm ára kennaranámi HÍ sem kemur inn á málefni innflytjenda. Í námskeiðinu er fjallað um skóla án aðgreiningar og fjölbreyttan nemendahóp, og þar með innflytjendur. Þeir sem taka kennsluréttindi til framhaldsskólakennslu taka engin skyldunámskeið er varða innflytjendur sérstaklega. Þess má geta að nemendur geta tekið valnámskeið um innflytjendur og valið námsleiðir þar sem fjallað er ítarlegra um málefni þeirra.

Þórdís Guðmundsdóttir, náms- og starfsráðgjafi í Tækniskólanum, hefur mikla reynslu af vinnu með innflytjendum í skólakerfinu og segir ýmsar ástæður að baki því að erfitt sé að halda þessum hópi ungmenna innan skólaveggjanna.

„Margir unglingar búa í tveimur menningarheimum, einn er heima og hinn í skólanum. Því gilda ólíkar reglur og gildi um hvað skipti mestu máli og hvernig maður hagar sér. Einnig geta verið ólík viðhorf til menntunar.“

Þórdís nefnir dæmi um unglinga frá Asíu þar sem ungt fólk á ekki að ávarpa eldri manneskjur að fyrra bragði eða segja að maður skilji ekki eitthvað. „Þetta getur valdið vandræðum því þau taka ekki frumkvæði og biðja ekki um aðstoð. Á þessu þurfa kennarar að átta sig.“

Almennt segir Þórdís þurfa að veita innflytjendum meiri stuðning í framhaldsskólunum og að menntun kennara sé mikilvæg. „Kennarar eru lykilmanneskjur. Þeir eru oft einir með hóp nemenda og þar með nýbúana. Þeir setja tóninn í hópnum, þeirra viðhorf og samskipti skipta þar af leiðandi svo miklu máli.“

Nánar verður fjallað um málið í Battlað í borginni sem er á dagskrá Stöðvar 2 í kvöld.

Greinin birtist í Fréttablaðinu 23.maí