Barði sig í hausinn með gosflösku til að vakna

Gunnar Hrafn Jónsson alþingismaður birti nýverið frásögn á Facebooksíðu sinn sem hefur vakið mikla athygli. En þar segir hann frá kasti sem hann fékk að næturlagi, en hann þjáist af því sem heitir „Sleep Paralysis“ eða svefnlömun.

Hér má lesa sig nánar til, hvað um ræðir.

Brjálaðar ofskynjanir milli svefns og vöku

„Ég hef um nokkurn tíma þjáðst af sérstöku afbrigði af því sem er almennt kallað "sleep paralysis" en hef aldrei fengið eins slæmt kast og í nótt og í morgun,“ skrifar Gunnar Hrafn. Og heldur svo áfram frásögn sinni sem er vissulega hrollvekjandi:

„Eftir langa baráttu við að skilja á milli raunveruleika og óraunveruleika tókst mér með einhverju móti að grípa í gosflösku á náttborðinu og berja mig ítrekað í höfuðið þar til restin af líkamanum vaknaði. Margir mannfræðinga telja að þetta ákaflega ógnvekjandi ástand hafi sennilega átt sinn þátt í að móta hjátrú og hryllingssögur fyrr á öldum, og skyldi engan undra. Það er ekkert sérstaklega gaman að vakna til meðvitundar semi-lamaður með brjálaðar ofskynjanir og geta ekki öskrað,“ skrifar Gunnar Hrafn og setur inn merki þess efnis að sér sé brugðið.

Kristaltær skelfing

Viðbrögðin hafa ekki látið á sér standa og í ljós kemur að fjöldi manna kannast við þetta fyrirbæri og hafa lent í hliðstæðum köstum. „Já, þetta virðist algengara en ég hélt,“ segir Gunnar Hrafn í samtali við Vísi.

Hann segist spurður hingað til hafa talið að þetta væri nokkuð sem hefði gert vart við sig á síðustu árum. „En eftir að ég fór að stúdera þetta aðeins á netinu í gær sýnist mér að þetta útskýri líka martraðir sem ég var með í æsku.“

Gunnar Hrafn segist ekki hafa leitað sér hjálpar vegna þessa en hann hefur reynt að lesa sig til um þetta á netinu.

„Þannig að ég vissi að þetta var ekki hættulegt og líklegt tengt svefnmynstri, þannig að ég reyni bara að sofa reglulega. Annars er fyndið hversu getur verið yfirvegaður með þetta strax á eftir, á meðan á þessu stendur er það kristaltær skelfing.“

Hálffull flaska af Kristal varð honum til bjargar

Ekki verður hjá því komist að spyrja Gunnar Hrafn hvers konar kókflaska þetta var sem hann notaði til að lemja sjálfan sig í hausinn til að komast út úr þessu ástandi. Þá kemur reyndar á daginn að þingmaðurinn hafði aðeins fært í stílinn. Um var að ræða um það bil hálffull plastflaska af Kristal, sítrónu.

Hitt er nú óneitanlega „Píratalegra“?

„Já,“ segir Gunnar Hrafn sem hikar hvergi við að gantast með þetta þó um sé að ræða alvarlegan atburð, alvarlegt ástand. „Eitthvað svona Coke Xtra Caffeine dæmi hefði verið meira í anda Pírata sennilega.“