Nýr borgarlistamaður er Ragnar Kjartansson

Ragnar Kjartansson myndlistarmaður var útnefndur Borgarlistamaður Reykjavíkur 2016 við hátíðlega athöfn í Höfða í gær.

Fram kemur í tilkynningu borgarinnar að Ragnar hafi borið hróður íslenskrar myndlistar og Reykjavíkur um heimsbyggðina. Menningar- og ferðamálaráð var einhuga í valinu.

Ragnar er þekktur fyrir fjölbreytt verk sem eiga rætur að rekja í ólíka miðla, þar á meðal leikhús, tónlist, málverk og bókmenntir. Hann hefur sýnt um allan heim og er stór einkasýning hans væntanleg í Listasafn Reykjavíkur á komandi ári.

Hann hlaut formlega menntun við Listaháskóla Íslands og Konunglegu listaakademíuna í Stokkhólmi. 

Fréttin birtist fyrst i Fréttablaðinu 18. júní.