Setja upp vatnsrennibraut í Bankastræti á morgun

Slip´N´Slide vatnsrennibraut verður opnuð í Bankastræti á hádegi á morgun og verður hægt að skella sér rennblautur niður Bankastrætið til klukkan 18.00 sama dag. Þetta kemur fram í tilkynningu frá Nova en fjarskiptafyrirtækið stendur fyrir brautinni í samstarfi við Samsung.

„Hliðar brautarinnar sem sett verður upp eru tæpur metri á hæð, hún er þriggja metra breið og volgt vatn rennur niður hana,“ segir í tilkynningunni.

„Tjald verður efst í Bankastrætinu þar sem fólk getur skipt yfir í baðfötin. Fjórir starfsmenn munu stýra röðinni í rennibrautina, tveir verða meðfram brautinni og svo verða aðrir fjórir neðst til að sjá til þess að allir séu öruggir. Sundlaug og öryggishlið verða neðst í brautinni til að taka á móti að taka á móti þeim sem koma rennblautir niður á fljúgandi ferð.“

Til stóð að setja upp vatnsrennibrautina þann 2. júlí síðastliðinn en veðuraðstæður voru ekki með besta móti og því neyddust skipuleggjendur til þess að fresta viðburðinum. Í raun var svo mikill vindur að erfiðlega gekk að koma brautinni aftur inn í geymslu sína eftir að hún hafði verið tekin þaðan. Á morgun er hins vegar spáð ágætisveðri, skýjað, 2 vindstig og 11 til 13 stiga hiti í Reykjavík.