Gordon Ramsay át hrátt lundahjarta í Vestmannaeyjum

Í nýjasta þætti kokksins Gordon Ramsay er sýnt frá för hans til Íslands. Þar bragðar hann meðal annars lunda auk þess að prófa að veiða nokkra slíka.

„Það er miklu betra að skjóta þá bara,“ segir Ramsay meðal annars við Vestmanneyinginn Ólaf Tý Guðmundsson meðan Ólafur kenndi honum að veiða lunda með háf.

Þeir ferðuðust síðar til óbyggðar eyju í nágrenni Heimaeyjar. Þar veiddu þeir lunda. „Fyrsta lunda tímabilsins er alltaf sleppt,“ sagði Ólafur við Gordon. Lundinn þakkaði síðan fyrir sig með því að bíta kokkinn í nefið.

Þegar heim var komið var gert að fuglunum og þeir eldaðir. Í millitíðinni ákváðu þeir félagar að snæða ferskt hjarta úr bráð ferðarinnar. Þessa veiðiferð, auk þess hvernig fuglinn var verkaður og eldaður, má sjá hér fyrir neðan.

Uppfært 19.21 Útlit er fyrir að um átta ára gamalt myndband sé að ræða sem Ramsay ákvað að rifja upp í dag. Beðist er innilegrar afsökunar á þessum leiða klúðri.