Halda upp á rúbínbrúðkaup

Við getum ekki treyst því að við verðum hérna megin grafar á gullbrúðkaupsdaginn. Því ætlum við að halda upp á rúbínbrúðkaupið á morgun með okkar nánustu en verðum ekki heima,“ segir Guðrún Karlsdóttir um 40 ára brúðkaupsafmæli sitt og Leo J. W. Ingasonar. Þau rifja upp fyrstu kynnin sem voru í Átthagasalnum á Hótel Sögu, eiginlega voru það átthagarnir sem leiddu þau saman. „Við byrjuðum að spjalla og Leó fékk áhuga á mér af því hann er Stranda­maður í föðurættina en ég úr næstu sýslu, Húnaþingi vestra. Leó er hálfur Hollendingur og mér fannst spennandi að hitta mann sem væri bara Íslendingur að hálfu leyti, það var svolítið öðruvísi. Þetta samband hefur enst ágætlega hjá okkur,“ segir Guðrún glaðlega. Guðrún kveðst hafa starfað á búi foreldra sinna á Stóru-Borg á sumrin fram undir tvítugt og rekstur fjárins á afrétt á vorin og haustgöngur standi upp úr í minningunum, fegurðin á fjöllum og útsýnið. En Leó var fyrstu fimm árin sín í Haag í Hollandi og flutti þá til Reykjavíkur með foreldrum og þremur systkinum. Hestamennska er Guðrúnu í blóð borin og hún fékkst við tamningar á árum áður. Leó er minna fyrir hestana en hjónin deila mörgum hugðarefnum, svo sem bóklestri, tungumálum og ferðalögum. Þau fóru bæði í langskólanám og náðu sér í hinar ýmsu gráður. Leó var bæjar- og síðan héraðsskjalavörður Kópavogs og sinnti kennslu við HÍ og víðar. Hann hefur á síðari árum stundað rannsóknir á doktorssviði við háskólann í Leiden Hollandi á hollensk-íslenskum samskiptum á fyrri öldum, einkum á sviði sjávarútvegs og verslunar. Guðrún hefur síldarsöltun, hótelstörf erlendis, skrifstofuvinnu og prentsetningu á Tímanum og fleira á ferilskránni. Hún var forstöðumaður skráningardeildar í Þjóðarbókhlöðunni og stundakennari við HÍ í bókasafns- og upplýsingafræði. Bæði hafa þau hjón unnið að ritstörfum og eru félagar í Bandalagi þýðenda og túlka. Tvö börn eignuðust þau Guðrún og Leó, Karlottu Maríu þýðanda og Gunnar Leó, tónlistar- og málvísindamann, sem lést fyrir níu árum. En hvar skyldu þau hafa látið pússa sig saman fyrir fjörutíu árum? „Það var í Langholtskirkju,“ lýsir Guðrún. „Leó ólst upp í Vogahverfinu og séra Sigurður Haukur Guðjónsson var prestur fjölskyldunnar. Við hittum hann utan við kirkjuna, hann fór strax að spjalla við okkur og þar með hvarf okkur allt stress. Við vorum líka mjög ánægð með orð hans í athöfninni.“ gun@frettabladid.is