Agent Fresco hitar upp fyrir Muse

Við höfum allir á einhverjum tímapunkti í lífi okkar fílað Muse, það er ein besta tilfinningin að hita upp fyrir hljómsveit sem maður ber mikla virðingu fyrir og hefur haft mikil áhrif á mann – það er ekki spurning að Muse hefur haft áhrif á okkur,“ segir Arnór Dan, söngvari Agent Fresco, um tilfinninguna að hita upp fyrir stórsveitina Muse í Laugardalshöllinni 6. ágúst.

„Ég veit að við í Agent Fresco getum gert svo ótrúlega margt en á sama tíma er ég svo þakklátur fyrir öll tækifæri og það að fólk nenni að hlusta á okkur – það að hita upp fyrir Muse það er bara stórkostlegt. Ég fæ „flashback“ síðan ég var í menntaskóla og í koverbandi þar sem við koveruðum Deftones og Muse. Þetta er því algjör draumur – við erum auðvitað þakklátir fyrir þetta tækifæri til að sanna okkur.

Við vitum að þetta er út af því að við erum búnir að spila stanslaust síðustu árin og við gefum áhorfendum alltaf eitthvað, hvort sem þeir fíla okkur eða ekki – hvort sem það er tilfinningarnar, textarnir, hljóðfæraleikurinn eða hversu agressívir við erum læf. Eins og landsliðið þá förum við ekki bara til að vera með, við ætlum að gefa fólki sem mætir á Muse frábært sjóv.“

Agent Fresco fengu glimrandi góða dóma á dögunum í The Independent fyrir spilamennsku sína á Be Prog! My Friend hátíðinni þar sem hljómsveitin er sögð ein sú mest spennandi í heiminum í dag.