Þorsteinn þakkaði forseta Alþingis fyrir að verja sig í þingsal

Þorsteinn Sæmundsson, þingmaður Framsóknarflokksins, fór í ræðustól við upphaf þingfundar í dag þar sem hann þakkaði forseta Alþingis, Einari K. Guðfinnssyni, fyrir að hafa varið sig í þingsal þegar hann var staddur á ráðstefnu í New York í Bandaríkjunum í síðasta mánuði. 

Þorsteinn segir fyrirspurn hafa borist á þingi um á hvaða vegum hann væri í New York án þess að hann væri viðstaddur þingfund. Um er að ræða kvennaráðstefnu Sameinuðu þjóðanna og var Þorsteinn eini þingmaður Íslendinga sem sótti hana. Þorsteinn sagðist hafa verið þarna á eigin kostnaði og vera hans á ráðstefnunni hefði verið rædd á fundi þingflokksformanni, og því þótti honum einkennilegt að þessi fyrirspurn hefði komið upp.

Það var Ólína Þorvarðardóttir, þingmaður Samfylkingarinnar, sem bar þessa fyrirspurn upp. Hún kvaddi sér hljóðs á eftir Þorsteini á þingi í dag og benti á að  að Þorsteinn hefði verið skráður á vefsíðu ráðuneytis sem fulltrúi Alþingis. Ólína spurði forseta Alþingis hvernig þingið hefði staðið að tilnefningu Þorsteins sem fulltrúa á kvennaþinginu, þar sem áður hefðu borist svör frá forseta Alþingis að þingið væri ekki í færum til að senda fulltrúa á þing.

Forseti Alþingis sagðist engu geta svarað um skráningu Þorsteins og að Alþingi hafði enga atbeina af því hvernig þingmaðurinn var skráður. 

Þorsteinn sagði að nafn hans hefði verið á lista yfir þátttakendur á kvennaþinginu og hann hefði verið birtur á vef ráðuneytis. Ólína sagði að hún fagnaði áhuga Þorsteins á kvenréttindabaráttu en sagði ótækt að þingmenn væru sjálfir að borga flugfar á mikilvægar ráðstefnur eins og kvennaþing Sameinuðu þjóðanna. Alþingi ætti að tilnefna og senda þingmenn á hana.