Segja átta hafa verið tekin af lífi á skipulagðan hátt

Yfirvöld í Ohio í Bandaríkjunum standa nú í umfangsmikilli leit að mögulegum morðingjum eftir að átta fjölskyldumeðlimir voru teknir af lífi á skipulagðan hátt í bænum Piketon í síðustu viku. Um er að ræða sjö fullorðna og einn táning. Lögreglan segir að þremur börnum hafi verið hlíft.

Ódæðið hefur haft veruleg áhrif á samfélagið og íbúar segjast mjög óttaslegnir. Fógeti Piketon ráðlagði ættingjum fjölskyldunnar að vopnast, óttist þau um líf sín. Morðin áttu sér stað á fjórum heimilum. Tvö þeirra eru nálægt hvoru öðru, en hin eru í nokkurri fjarlægð frá þeim tveimur.

Fógetinn Charles Reader segir að flest fórnarlömbin hafi verið sofandi þegar þau voru skotin til bana.

Lögreglan hefur að öðru leyti varist fregna af málinu, samkvæmt AP fréttaveitunni, en þeir segja þó að kannabisræktun hafi fundist á heimilum fólksins sem var myrt. Ekki er vitað hvort að morðin tengist ræktuninni.

Þá hefur lögreglan rætt við um 50 manns vegna rannsóknarinnar og fjölmenn teymi rannsakenda eru enn að störfum við heimilin.

Fórnarlömbin voru 44 til 16 ára gömul. Ein 19 ára gömul kona var meðal fórnarlambanna og þegar hún var skotin var hún með nokkurra daga gamalt barn með sér í rúminu.

Ekki er vitað hvort að morðin voru framin af einum eða fleiri aðilum. Ríkissaksóknari Ohio segist þó telja líklegt að um fleiri en einn morðingja hafi verið að ræða. Þá liggur ekki fyrir hvenær morðin voru framin. Morðin voru fyrst tilkynnt á föstudagskvöldið.

Búið er að birta símtöl til Neyðarlínunnar vegna morðanna.