Byggja upp grjótgarða undir yfirborðinu

Unnið er að því þessa dagana að styrkja varnargarða í útfalli Jökulsár á Breiðamerkursandi skammt fyrir ofan brúna. Garðarnir eru ekki sýnilegir, en framkvæmdirnar hafa vakið athygli þar sem stórvirkar vinnuvélar hafa myndað bryggju til að koma efni á sinn stað.

Grjótþröskuldi var komið fyrir innan við brúna á sínum tíma í þeim tilgangi að stórir jakar strandi þar fyrir innan og haldist í lóninu. Þetta er gert til þess að koma í veg fyrir að stórir jakar skemmi brúna. Árið 2006 var bætt í þröskuldinn en árið 2009 sýndu mælingar að hann hafði lækkað um fjóra metra á þremur árum. Í stórsteymi í ágúst það ár komust stórir jakar yfir þröskuldinn og að brúnni. Var mat Vegagerðarinnar á þeim tíma að illa hefði getað farið og var strax í júní árið eftir ráðist í að byggja garðinn upp, líkt og nú. Þess má geta að á þeim tíma var óvíst um framkvæmdir vegna efnahagsástandsins en ekki þótti réttlætanlegt að bíða.

Verkefnið er í höndum Vegagerðarinnar og ástæðan fyrir því að mannvirkin eru sýnileg nú er að ekki er öðruvísi hægt að gera vinnuvélum kleift að koma grjóti í grjótþröskuldinn þetta langt úti í lóninu.

„Það er verið að bæta grjóti ofan á einn af þröskuldunum sem eru í Jökulsánni. Þessi þröskuldur er ofan brúarinnar og tilgangur hans er að varna því að árbotninn grafist og einnig að að verja brúna fyrir stórum ísjökum sem annars gætu borist úr lóninu. Það er búið öðrum megin en verður fljótlega byrjað hinum megin, á allra næstu dögum, þessi þröskuldur verður þannig að hann sést ekkert, frekar en verið hefur, og þegar framkvæmdum lýkur verður hann þremur metrum fyrir neðan yfirborðið,“ segir G. Pétur Matthíasson, forstöðumaður samskiptadeildar Vegagerðarinnar. Hann reiknar með að verkinu ljúki um miðjan mánuðinn og þá verður sýnilegur hluti mannvirkjanna fjarlægður. 

Fréttin birtist fyrst í Fréttablaðinu 2. júní